Onlayn ictimai-siyasi qəzet
Rəzil əməlləri ilə qürur duyan oğlanlar
“Qonşu stolda 7 nəfər idilər, yeyib-içirdilər, danışıqlarından gördüm ki, hamısı azərbaycanlıdır. TIR sürücüləriydi, bir gecə Batumidə qalıb, sonra Sarpdan keçib Türkiyəyə gedəcəkdilər. Lotuluq edirdilər, xoşuma gəlmədi. Mən də acarlarla, gürcülərlə oturmuşdum. Çıxdım bayıra, Batumi polisində tanış podpolkovnik vardı, ona zəng elədim, dedim, belə-belə. Yarım saat çəkmədi, spesnaz gəldi, hamısını danaboyun edib apardılar”.
Bu “qəhrəmanlığı”nı mənə bir taksi sürücüsü təmir sexində danışıb, özü də qürur duya-duya. Heç nə. Adam başqa ölkədə öz soydaşlarından işverənlik edib, onları, kim bilir, nə qədər xərcə salıb, hələ bir öz hərəkəti ilə də fəxr edir, kimə gəldi, danışır.
“Keçən ay Alanyada bizim turfirmanın xətti ilə otellərə gələn azərbaycanlılara yaxtalara, tarixi yerlərə, gəzintilərə tur-paketlər satırdım. Bir ana-bala vardı, nə qədər tur təklif etdim, heç birini almadılar, dedilər, biz gəzmək istəmirik, eləcə, dənizdə, hovuzda üzməyə gəlmişik. Dedim, yaxşı. 3-4 gündən sonra getmək vaxtları çatanda bunları Antalya aeroportuna aparmalıydım. Avtobus sürücümüzə əvvəlcədən dedim, çox da tələsməsin. Antalyaya yaxınlaşanda işarə elədim ki, tıxac olan yerdən sürsün. O da bir sözümü iki eləmirdi. Yolda ilişdik. Təyyarəyə qeydiyyat başlayıb, bizim isə yol açılsa, hələ yarım saat yolumuz var. Anası da, qız da başladılar etiraz etməyə. Dedim, görürsünüz də, yol bağlıdır, mən nə edə bilərəm. Təklif etdim ki, düşüb piyada getsinlər, irəlidə taksi tutsunlar. Acıqlı-acıqlı düşüb getdilər, daha bilmədim, təyyarəyə çatdılar, ya yox. Məncə, heç cür çata bilməzdilər”.
Bu “qəhrəmanlığı”nı da mənə əslən Goranboydan olan, ilin yarısını Türkiyə kurortlarına turist göndərən turfirmanın koordinatoru danışıb. O da qürbət eldə iki azərbaycanlı qadını çar-naçar qoymasını fəxr edə-edə danışırdı. 3-5 manat tuta bilmədiyinə görə qadınların təyyarə biletini bilərəkdən yandırıb, hələ bir öz mərdiməzarlığı ilə də fəxr edir.
Belə hadisələrdən sizə də danışmış olarlar. Mütləq hər kəsin bu cür “fərasətli”, “prinsipial”, yeri gələndə yamanlıq etməyi bacaran və bunu sonradan yaxşı bir iş görüblərmiş kimi öyünə-öyünə danışan tanışlarınız var.
Onlar mütləq zəif damarlarını tutduqları adamı soyublar, kimisə şantaj edib nəyinisə ələ keçiriblər, aldadıb bahalı malını (evini, maşınını, danasını) ucuz qiymətə alıblar, kimisə şərləyib, at kimi üzünə durublar, bir mənzili 3 nəfərə satıblar, xarici universitetlərə “tələbə qəbulu” aparıb, pulları yığıb, aradan çıxıblar və s. Və bunu utanıb xəcalət çəkmədən, öz ütüklüklərinin, fərasətlərinin bariz nümunəsi kimi danışırlar.
Hamı da qəşəngcə dinləyir. Çox adam deyir ki, vallahi, sənə halaldır, harda olsa, baş çıxaran adamsan. Belələrinə həsəd aparanlar, böyüyəndə onlar kimi kəmfürsət, cələkəsən, mərdiməzar, haramxor olmaq istəyən gənclər var.
Belələrini qınayanlar davaya düşə bilər. Çünki mütləq yerbəyerdən “bacarana baş qurban” sədası eşidəcək. Əsas məsələ qabağa düşmək, qisas almağı bacarmaqdır, ta bunu necə edəcəksən, beşinci dərəcəli məsələdir.
Dünən DİN-in polkovniki Elşad Hacıyev 10 min manat “qabağa düşmüş” bir dələduz gədənin şəklini və barəsində qısa informasiya paylaşmışdı. Üz-gözündən narkomanlıq yağan bu adam, görün, nə edirmiş. Bu məxluq müalicələrinə böyük məbləğdə pul lazım olan və bu məqsədlə xəstələrə yardım üçün sosial şəbəkədə paylaşılan kart nömrələrindən istifadə edərək hesablara girir, xəstələrin son ümid yeri olan pulları hesabdan çıxarır, mənimsəyirmiş.
Heş şübhəniz olmasın ki, o, ilişib ələ keçməsə, bir müddətdən sonra qürur duya-duya 2025-ci ildə necə zəkicə hərəkətlər etdiyini, filan qədər qabağa düşdüyünü dost-tanışına danışacaqdı.
Halbuki, bu adam dünyanın ən alçaq adamıdır (barəsində məhkəmə qərarı olmadığına görə “cani” deməyək) . Bundan aşağısı yoxdur. Ev soyan, maşın qaçıran, bank yaran canilərin yenə bir səviyyəsi var, beləsi kasıbın hinindən toyuq oğurlayandan da betərdir.
Başqa vaxt əyri yollara, “başını birtəhər dolandırmağa”, “fəndgirlik edib 5 manat qabağa düşməyə”, nə bilim, kiməsə “50 min dollar atmağa” birbaşa və dolayısı ilə haqq qazandıran camaatımızın nümayəndələri, bir görəydiniz, ağır xəstələrin müalicə pulunu mənimsəyən gədəyə nələr yazmışdılar. Özü bunları oxusa və canında bircə damcı vicdan hissi varsa, özünü öldürərdi.
Amma belə adamlarda vicdan, insaf, mürvət, abır-həya, ümumiyyətlə heç bir müsbət keyfiyyət olmur. Bunlar cəmiyyətin tullantılarıdır. Bunlar düzələn deyillər və dürüst insanların, halal zəhməti ilə dolananların qənimidirlər.
Samir SARI 
YAZARIN DİGƏR YAZILARI
02 Iyun 2026
30 May 2026
22 May 2026
20 May 2026
18 May 2026
16 May 2026
14 May 2026
12 May 2026
09 May 2026
07 May 2026
05 May 2026
03 May 2026
01 May 2026
30 Aprel 2026
28 Aprel 2026
25 Aprel 2026
23 Aprel 2026
21 Aprel 2026
19 Aprel 2026
16 Aprel 2026
14 Aprel 2026
12 Aprel 2026
10 Aprel 2026
07 Aprel 2026
05 Aprel 2026
02 Aprel 2026
31 Mart 2026
28 Mart 2026
26 Mart 2026
24 Mart 2026
ŞƏRHLƏRŞƏRH YAZ