Onlayn ictimai-siyasi qəzet
Erməni terrorçularının Ottavada güllələdiyi türk polkovnik – qatilləri 44 ildir tapılmır
1982-ci il avqustun 27-də Kanadanın paytaxtı Ottavada Türkiyənin hərbi attaşesi, Hərbi Hava Qüvvələrinin polkovniki Atilla Altıkat erməni terrorçularının silahlı hücumu nəticəsində qətlə yetirilib.
Musavat.com xəbər verir ki, terror aktını “Erməni Soyqırımı Ədalət Komandoları” – JCAG (Justice Commandos for the Armenian Genocide) adlı erməni terror təşkilatı törədib. Qətldən sonra təşkilat hücumun məsuliyyətini üzərinə götürüb.
Atilla Altıkat 1937-ci ildə İstanbulda anadan olub. Hərbi təhsil aldıqdan sonra Türkiyə Hərbi Hava Qüvvələrində xidmət edib və polkovnik rütbəsinə qədər yüksəlib. 1981-ci ildə Türkiyənin Kanadadakı səfirliyinə hərbi attaşe təyin olunub. Ailəli və iki uşaq atası olan Altıkat qətlə yetiriləndə 45 yaşında idi.
Qətl necə törədilib?
1982-ci il avqustun 27-də səhər saatlarında Atilla Altıkat avtomobili ilə Türkiyə səfirliyinə gedirdi. Ottavanın Island Park Drive ərazisində işıqforun qırmızı işığında dayandığı zaman terrorçu onun avtomobilinə yaxınlaşıb.
Silahlı şəxs 9 millimetrlik tapançadan Altıkatın avtomobilinə ardıcıl atəş açıb. Ümumilikdə 13 atəş açılıb. Polkovnik aldığı çoxsaylı güllə yaralarından hadisə yerində həyatını itirib.
Terrorçu hadisə yerindən qaçıb. Qətldən az sonra xəbər agentliyinə zəng edən şəxs hücumun məsuliyyətini JCAG adından üzərinə götürüb.
Türk diplomatlarına qarşı erməni terroru
Atilla Altıkatın qətli 1970–1980-ci illərdə dünyanın müxtəlif ölkələrində türk diplomatlarına və Türkiyənin xarici nümayəndəliklərinə qarşı həyata keçirilən erməni terroru dalğasının ən səs-küylü hadisələrindən biri olub.
Bu terror kampaniyasının əsas təşkilatları ASALA – “Ermənistanın Azadlığı uğrunda Erməni Gizli Ordusu”, JCAG – “Erməni Soyqırımı Ədalət Komandoları” və ARA – “Erməni İnqilabi Ordusu” idi.
Bu təşkilatlar türk diplomatlarını, səfirlik və konsulluq əməkdaşlarını, onların ailə üzvlərini, eləcə də mülki şəxsləri hədəfə alaraq müxtəlif ölkələrdə sui-qəsdlər, silahlı hücumlar və partlayışlar törədiblər.
Türkiyə Xarici İşlər Nazirliyinin rəsmi məlumatına görə, 1973–1986-cı illərdə ASALA, JCAG və ARA-nın terror hücumları nəticəsində 58 Türkiyə vətəndaşı həyatını itirib. Onlardan 31-i diplomat və diplomatların ailə üzvləri olub. Xarici ölkə vətəndaşları da daxil olmaqla hücumlarda ümumilikdə 77 nəfər öldürülüb, çoxsaylı insanlar yaralanıb.
Terror dalğası 1973-cü ildə Los-Ancelesdə Türkiyənin baş konsulu Mehmet Baydar və konsul Bahadır Demirin erməni terrorçu tərəfindən qətlə yetirilməsi ilə başlayıb. Sonrakı illərdə Türkiyənin dünyanın müxtəlif ölkələrində çalışan diplomatları bir-birinin ardınca terror hücumlarının hədəfinə çevriliblər.
1975-ci ildə Türkiyənin Vyanadakı səfiri Daniş Tunalıgil, 1980-ci ildə Sidneydə baş konsul Şarık Arıyak və attaşe Engin Sever, 1982-ci ildə Los-Ancelesdə baş konsul Kemal Arıkan, Bostonda fəxri baş konsul Orhan Gündüz, Lissabonda inzibati attaşe Erkut Akbay və Ottavada hərbi attaşe Atilla Altıkat erməni terrorçuları tərəfindən qətlə yetiriliblər.
1982-ci il xüsusilə qanlı olub. Həmin il avqustun 7-də ASALA terrorçuları Ankaranın Esenboğa hava limanında da silahlı hücum həyata keçiriblər. Terror aktı nəticəsində 9 nəfər öldürülüb, 82 nəfər yaralanıb.
Atilla Altıkatın qatilləri tapılmadı
Atilla Altıkatın qətlinin məsuliyyətini JCAG üzərinə götürsə də, polkovniki güllələyən terrorçular məhkəmə qarşısına çıxarılmayıblar. Kanada və ABŞ hüquq-mühafizə orqanlarının apardığı araşdırmalara baxmayaraq, qətlin bilavasitə icraçıları məsuliyyətə cəlb edilməyib.
Atilla Altıkatın xatirəsi sonradan Ottavada əbədiləşdirilib. Onun öldürüldüyü ərazinin yaxınlığında Altıkatın və xaricdə xidməti vəzifəsini yerinə yetirərkən həyatını itirən diplomatların xatirəsinə memorial ucaldılıb.
Musavat.com
XƏBƏR LENTİ
06 Sentyabr 2026
01:55 Günlərlə suda qaldı – Qazax xilasedicilər taqətdən düşmüş atı ölümdən belə qurtardılar - Video
05 Sentyabr 2026
ŞƏRHLƏRŞƏRH YAZ