Onlayn ictimai-siyasi qəzet
Tehranda fövqəladə iclas, parlamentdə “Amerikaya ölüm” şüarları – İranda ölənlərin sayı 116-nı keçdi
İranda davam edən kütləvi etirazlar fonunda siyasi gərginlik pik həddə çatıb.
Musavat.com xəbər verir ki, “Associated Press” (AP) agentliyinin məlumatına görə, İran parlamenti təcili iclas keçirərək ölkəni silkələyən etirazları müzakirə edib.
Agentlik yazır ki, müzakirələr zamanı parlamentdə gərgin anlar yaşanıb. Bir qrup deputat qəfil iclas zalının tribunasına doğru irəliləyərək “Amerikaya ölüm!” şüarları səsləndirib. Bu görüntülər ölkə daxilində və beynəlxalq aləmdə ciddi rezonans doğurub.
AP-nin yerli insan haqları təşkilatlarına istinadla verdiyi məlumata görə, etiraz aksiyaları zamanı ölkə üzrə azı 116 nəfər həlak olub, təxminən 2600 nəfər isə saxlanılıb. Lakin agentlik vurğulayır ki, dəqiq rəqəmləri söyləmək çətindir, çünki İranda internet və beynəlxalq mobil rabitə kəsilib.
Məlumata görə, informasiya blokadası hadisələrin real miqyasını gizlətməyi daha da asanlaşdırır və ölənlərin, yaralananların və saxlanılanların sayının açıqlanandan xeyli çox ola biləcəyi ehtimal olunur.
Qeyd edək ki, İranda etirazlar 28 dekabrdan başlayıb və ölkənin demək olar ki, bütün regionlarını əhatə edib. Sosial-iqtisadi narazılıqla başlayan aksiyalar getdikcə siyasi xarakter alıb və hakimiyyətə qarşı açıq şüarlarla müşayiət olunur.
Ekspertlər hesab edirlər ki, parlamentdə baş verənlər hakimiyyət daxilində də narahatlığın artdığını göstərir. Deputatların emosional çıxışları və anti-Amerika şüarları isə Tehranın daxili böhranı xarici amillərlə əlaqələndirməyə çalışdığını ortaya qoyur.
Beləliklə, İran həm küçələrdə, həm də parlament divarları arasında dərin siyasi və ictimai böhran yaşayır. İnternetin kəsilməsi, artan itkilər və sərt ritorika isə vəziyyətin yaxın vaxtlarda yumşalacağına dair ümidləri azaldır.
Musavat.com
XƏBƏR LENTİ
10 Iyun 2026
09 Iyun 2026
ŞƏRHLƏRŞƏRH YAZ