Onlayn ictimai-siyasi qəzet
Kremldən ard-arda TƏCİLİ AÇIQLAMALAR: Üçtərəfli sülh masası bərpa oluna bilər
Rusiya Prezidenti Vladimir Putin və ABŞ Prezidenti Donald Tramp arasında yaxın saatlarda telefon danışığının baş tutacağı gözlənilir.
Musavat.com xəbər verir ki, bu barədə Rusiya Prezidentinin mətbuat katibi Dmitri Peskov məlumat verib. Kreml rəsmisi bildirib ki, dövlət başçılarının birbaşa təması amerikalı xüsusi emissarlar – Cared Kuşner və Stiv Vitkoffun Moskva və Kiyevə reallaşdırdıqları yüksəksəviyyəli missiyanın yekunlarına əsasən planlaşdırılır.
Dmitri Peskov Moskvada jurnalistlərə açıqlamasında Rusiya ilə ABŞ arasındakı təmaslar və Ukrayna münaqişəsinin həlli istiqamətindəki son vəziyyətlə bağlı mühüm bəyanatlarla çıxış edib. O vurğulayıb ki, Rusiya tərəfi Ukrayna üzrə üçtərəfli sülh danışıqlarının bərpa olunması ehtimalını tamamilə istisna etmir və amerikalı vasitəçilərin göstərdiyi səyləri yüksək qiymətləndirir. Peskovun sözlərinə görə, Vladimir Putin şəxsən Donald Trampın sülhün bərqərar olmasına yönəlmiş addımlarına görə ona minnətdarlığını bildirib. Bununla yanaşı, Kreml sözçüsü ABŞ emissarlarının Moskva görüşündə təqdim etdiyi yeni şərtlərin "Ankoric formulası"ndan nə ilə fərqləndiyini açıqlamaqdan imtina edib və Vaşinqton nümayəndələrinin Kiyevdə keçirdiyi danışıqların yekun nəticələrini gözlədiklərini bildirib.
Diplomatik hərəkətlilik fonunda Ermənistanın Baş naziri Nikol Paşinyanın da Moskvaya gözlənilən rəsmi səfərinin detalları bəlli olub. Peskov bildirib ki, liderlərin Bişkekdə baş tutan əvvəlki görüşünün məzmunlu davamı olaraq Putin Paşinyanı şəxsən Rusiyaya dəvət edib və Ermənistan rəhbəri bu dəvəti qəbul edib. Moskva zirvəsində əsas müzakirə mövzusu ikitərəfli ticarət-iqtisadi əlaqələrlə yanaşı, Ermənistanın gələcək inkişaf kursu, geostrateji orientasiyası və ölkədə keçirilməsi planlaşdırılan müvafiq referendum olacaq.
Eyni zamanda Kreml rəsmisi şimal sərhədlərindəki hərbi aktivliyə də toxunaraq xəbərdarlıq edib. Peskov Norveç tərəfinin son vaxtlar həyata keçirdiyi hərbi quruculuq işlərinin Rusiya tərəfindən birbaşa təhlükə kimi qiymətləndirildiyini və Moskvanın bununla bağlı əlavə adekvat təhlükəsizlik tədbirləri görəcəyini bəyan edib.
Musavat.com
ƏLAQƏLİ XƏBƏRLƏR
XƏBƏR LENTİ
08 Sentyabr 2026
07 Sentyabr 2026
ŞƏRHLƏRŞƏRH YAZ