Onlayn ictimai-siyasi qəzet
Argentina Malvin adalarına görə 45 şəxs və təşkilata sanksiya tətbiq etdi
Argentina hakimiyyəti mübahisəli Malvinas (Folklend) adaları yaxınlığında neft yataqlarının kəşfiyyatı və işlənməsi ilə məşğul olan 45 şəxs və təşkilata qarşı sanksiyalar tətbiq edib.
Musavat.com xəbər verir ki, məlumatı ölkə prezidentinin ofisi açıqlayıb: "Bu gün Argentina Respublikasının Xarici İşlər Nazirliyi Prezident Xavyer Mileyin göstərişi ilə 45 fiziki və hüquqi şəxsə qarşı sanksiyalar tətbiq etdi, çünki onların Malvin adalarımızda karbohidrogenlərin kəşfiyyatı və hasilatı ilə bağlı fəaliyyətlərlə məşğul olduqları güman edilir".
Hədəfdə olan şirkətlər və ya şəxslər barədə heç bir məlumat verilməyib.
Sanksiyalar həmçinin yataqları inkişaf etdirən şirkətlərin səhmdarlarını və onlara xidmət göstərən hüquqi şəxsləri də əhatə edəcək: "Bu tədbir ölkəmiz üçün mübarizə aparan və canını fəda edən bütün insanlar üçün ədalət aktıdır. Bu, həmçinin dünyaya açıq bir siqnaldır: Argentina Respublikası Malvin adaları üzərində suverenliyindən imtina etməyib və heç vaxt imtina etməyəcək".
3 sentyabrda Miley millətə müraciətində Malvin adalarında neft hasil edən şirkətlərə qarşı sanksiyaları sərtləşdirmək üçün Parlamentə qanun layihəsi təqdim edəcəyini açıqlayıb. Buna səbəb Britaniya şirkəti Rockhopper Exploration və İsrailin Navitas Petroleum şirkətləri tərəfindən Malvin adaları yaxınlığında neft hasilatı layihəsinin başladılmasıdır.
Malvinas (Folklend) adaları 12.000 kvadrat kilometrdən bir qədər çox ərazini əhatə edən və təxminən 3200 nəfər əhalisi olan iki böyük və təxminən 800 kiçik adadan ibarətdir. 200 ildir ki, onlar Argentina ilə Birləşmiş Krallıq arasında ərazi mübahisəsinin mövzusu olublar.
Musavat.com
XƏBƏR LENTİ
05 Sentyabr 2026
ŞƏRHLƏRŞƏRH YAZ