Azərbaycanın Xalq artisti, tanınmış bəstəkar və müğənni, ictimai-siyasi xadim Polad Bülbüloğlunun şəxsi həyatı ilə bağlı mediada yeni məlumat yayılıb. Bildirilir ki, sənətçi və diplomat üçüncü dəfə ailə həyatı qurub. Məlumata görə, Polad Bülbüloğlunun həyat yoldaşı Azərbaycanın Əməkdar artisti, tanınmış rəqqasə və pedaqoq Eteri Cəfərovadır. 1978-ci ildə anadan olan E.Cəfərova uzun illərdir Azərbaycan rəqs sənətində fəaliyyət göstərir. O, hazırda Bakı Xoreoqrafiya Akademiyasının Milli və müasir rəqs kafedrasında müəllim kimi çalışır və gənc rəqqasların peşəkar hazırlığı ilə məşğuldur.

Polad Bülbüloğlunun üçüncü evliliyi barədə yayılan məlumat sənətçinin əvvəlki ailə həyatı və münasibətlərini də yenidən gündəmə gətirib.

Musavat.com Polad Bülbüloğlunun şəxsi həyatı, əvvəlki evlilikləri və ailə münasibətləri ilə bağlı məlum faktları təqdim edir.

Poladın tam adı Polad Murtuza oğlu Məmmədovdur. O, 1945-ci il fevralın 4-də Bakıda anadan olub. Atası Murtuza Məşədi Rza oğlu Məmmədov Azərbaycanda tanınmış opera müğənnisi, pedaqoq və musiqişünas olub. O, SSRİ Xalq artisti fəxri adına layiq görülüb, 1950-ci ildə Stalin mükafatı alıb. Murtuza Bülbül Azərbaycanın musiqili teatrının yaradıcılarından biri hesab olunur. Pərəstişkarları onu azərbaycanca “bülbül” mənasını verən “Bülbül” adı ilə çağırırdılar. Oğluna isə Polad kimi sərt səslənən ad qoyub. Lakin Polad böyüdükdən sonra atasının təxəllüsünü götürərək “Bülbüloğlu” soyadını seçib və atası kimi məlahətli səsi ilə tanınıb.

Anası Adelaida Rza qızı Məmmədova isə həyat yoldaşının xatirə muzeyinin direktoru kimi fəaliyyət göstərib, ictimai işlərlə məşğul olub. O, Azərbaycan Prezidentinin fərdi təqaüdçüsü olub.

Poladdan başqa ailədə daha bir oğul – Çingiz böyüyüb. Gələcəkdə tanınmış musiqiçi olacaq Poladın uşaqlıq illəri Bakıda keçib. Ailənin ziyalı və mədəniyyət xadimlərinin, eləcə də partiya nümayəndələrinin yaşadığı nüfuzlu binada mənzili olub. Bəzən o, Qafqazın qeyri-rəsmi “konservatoriyası” hesab olunan Şuşada qohumlarının yanında qalırdı.

Musiqiçi uşaqlıq illərini xatırlayarkən dəcəl və nadinc olduğunu deyirdi. Məsələn, sevdiyi kitabın qəhrəmanı Tarzan kimi bütün həyətə səs salaraq qışqırdığını xatırlayırdı. Polad uşaqlıq dostu Müslüm Maqomayevlə birlikdə dəcəllik edir, ucadan və ahəngsiz mahnılar oxuyaraq qonşuları özlərindən çıxarırdılar. O zaman binanın sakinləri heç bilmirdilər ki, çox keçmədən yanlarında yaşayan bu iki uşağın estrada ulduzlarına çevrilməsi ilə fəxr edəcəklər. Müslümün özünəməxsus bariton səsi, Poladın isə lirik tenor səsi var idi.

Polad musiqi məktəbində fortepiano sinfində təhsil alıb. Məktəbi bitirdikdən sonra Üzeyir Hacıbəyli adına Azərbaycan Dövlət Konservatoriyasına daxil olub. 1963-1968-ci illərdə bəstəkar Qara Qarayevin rəhbərliyi altında bəstəkarlıq ixtisası üzrə təhsil alıb.

Poladın səhnəyə ilk çıxışı 17 yaşında baş verib. O, atasının çıxışını müşayiət etmək üçün səhnəyə çıxıb. Həmin vaxt artıq özü də mahnılar bəstələyirdi. Onun bəzi əsərləri uşaqlıq dostu Müslüm Maqomayevə həsr olunmuşdu.

Konservatoriyada təhsil aldığı illərdə Bülbüloğlu Azərbaycan folkloruna ciddi maraq göstərməyə başlayıb. Xüsusilə bayatı janrına böyük maraq göstərib. Gənclik illərində bu janr üzərində eksperimentlər apararaq Azərbaycan xalq yaradıcılığının həmin formasından istifadə etməklə bir sıra mahnılardan ibarət silsilə yaradıb.

Polad Bülbüloğlu hələ 24 yaşında SSRİ Bəstəkarlar İttifaqının üzvü seçilib. Gənc müğənni və bəstəkarı yalnız milli musiqi ənənələri deyil, müasir musiqi də maraqlandırırdı. O, yaradıcılığında bu iki istiqaməti – Azərbaycan xalq musiqisinin zəngin ənənələri ilə müasir musiqi üslubunu bir-birilə ahəngdar şəkildə birləşdirməyi bacarıb.

Polad Bülbüloğlunun albomlarından səslənən mahnılar bir vaxtlar demək olar ki, hər evdə eşidilirdi. Musiqiçinin özünəməxsus lirik tenor səsi vardı. Mahnılarını virtuoz ifa etməsi isə onun yaradıcılığına xüsusi cazibə qatırdı. Bununla yanaşı, bəstəkar yaradıcılığında ciddi akademik musiqiyə də geniş yer verib, çoxsaylı simfonik və kamera-instrumental əsərlər bəstələyib.

Bülbüloğlunun populyarlığının xüsusilə 1980-ci illərdə zirvəyə çatdığı bildirilir. Onun yaradıcılığı sovet estradasının parlaq ulduzları tərəfindən də yüksək qiymətləndirilib. İstedadlı azərbaycanlı bəstəkarın mahnıları İosif Kobzon, Lüdmila Sençina, Lev Leşşenko, Roksana Babayan və digər məşhur ifaçıların repertuarına daxil edilib. Həmin illərdə “Razdolie”, “Pozvoni”, “Ozarennıy mir” kimi mahnılar radio dalğalarında tez-tez səslənirdi.

Bülbüloğlu zaman-zaman yeni nəsil sənətçilərlə də duetlərə imza atıb. 2000-ci illərin əvvəllərində konsertlərin birində o, Nikolay Baskovla birlikdə səhnəyə çıxaraq məşhur Azərbaycan mahnısı “Gəl ey səhər”i ifa edib. Rusiyanın tanınmış tenorunun Polad Bülbüloğlu ilə münasibətləri də əvvəldən formalaşıb. Belə ki, Baskovun atası da bəstəkarla dostluq edib.

Lakin çoxşaxəli yaradıcılığa malik Polad Bülbüloğlunu yalnız musiqi maraqlandırmırdı. Onun kino sahəsində də əməkdaşlıq təcrübəsi var. Xarici görünüşü ilə də seçilən gənc və yaraşıqlı sənətçi bir neçə sovet filminin çəkilişlərinə dəvət olunub. Bunlar “Na krılyax pesni” (“Mahnının qanadlarında”) və “Skazki russkogo lesa” (“Rus meşəsinin nağılları”) filmləri olub. 1981-ci ildə isə Polad Bülbüloğlu rejissor Yuli Qusmanın çəkdiyi macəra-komediya janrında olan “Qorxma, mən səninləyəm!” filmində rol alıb.

Qusman əvvəlcə Poladdan film üçün romantik musiqi əsərləri bəstələməsini istəyib. Bülbüloğlu rejissorun istəyini yerinə yetirib. Lakin çəkiliş prosesində Qusman bəstəkarı daha yaxından tanıdıqca onun aktyorluq potensialını da görüb. Rejissor Polad Bülbüloğlunun “Teymur” obrazını canlandıra biləcəyinə qərar verib. Filmin ekranlara çıxmasından sonra Polad Bülbüloğlu bu dəfə bəstəkar və müğənni kimi deyil, aktyor kimi də böyük populyarlıq qazanıb. 2013-cü ildə həmin filmin davamı – “Qorxma, mən səninləyəm! 1919” ekranlara çıxıb. Polad Bülbüloğlu bu filmdə də “Teymur” obrazını canlandırıb. Lakin bu dəfə tamaşaçı qarşısına obrazın bir neçə onillik yaşlanmış versiyasında çıxıb.

Polad Bülbüloğlu qadınların da diqqət mərkəzində olub və sovet dövrünün ən yaraşıqlı kişiləri sırasında göstərilib. Musiqiçi ilk dəfə opera müğənnisi, əslən ukraynalı olan Bela Rudenko ilə ailə həyatı qurub. Polad Bülbüloğlu həyat yoldaşından 12 yaş kiçik olub. Lakin yaş fərqi onların münasibətinə mane olmayıb. Həmin dövrdə Belanın adı və sənətkarlığı artıq bütün dünyada tanınırdı, fotoları isə mütəmadi olaraq jurnalların üz qabığını bəzəyirdi. Onun şöhrəti və istedadı gənc Poladın da diqqətini cəlb edib.

Bülbüloğlu Belaya sevgisini şərq təmtərağı ilə göstərirdi: onu gül-çiçəklərə qərq edir, dəbdəbəli şam yeməkləri təşkil edirdi. Nəhayət, Rudenko onun sevgisinə qarşılıq verdi və Polad Bülbüloğlu ilə ailə həyatı qurdu.

Övladının dünyaya gəlməsi Belanın sənətdən uzaqlaşmasına səbəb olmadı. Müğənni qısa müddət sonra yaradıcılıq fəaliyyətinə qayıtdı. Lakin tez-tez qastrollara getməsi və həyat yoldaşından uzun müddət ayrı qalması ailə münasibətlərinə mənfi təsir göstərdi. Beləliklə, onların şəxsi həyatında dönüş nöqtəsi yarandı. Cütlük qarşılıqlı razılıq əsasında, sakit şəkildə ayrılmaq qərarına gəldi. Bu evlilikdən onların Teymur adlı oğlu dünyaya gəldi. O da atasının yolunu davam etdirərək musiqiçi oldu və Rusiyanın Əməkdar artisti adına layiq görüldü. Hazırda Teymur Polad oğlu Məmmədov P.İ.Çaykovski adına Böyük Simfonik Orkestrin faqot qrupunun konsertmeysteri vəzifəsində çalışır. Teymur Bülbül atası Polad Bülbüloğlu ilə əlaqələri heç vaxt kəsməyib və ata-oğul münasibətləri indi də normal olaraq davam edir. Onun hətta atasının ikinci aləsi, ögey bacı-qardaşı ilə də isti münasibətləri var, Teymur ailə tədbirlərində yaxından iştirak edir.

“Poladla ilk görüşməyimə və onunla ailə həyatı qurmağıma görə peşmanam?! Xeyr. Bu evlilik bizi bir araya gətirən gözəl bir dövr idi. Bu, sonradan sönüb gedən böyük bir sevgi idi. İnsan belə gözəl hissi yaşamaq imkanı verdiyi üçün Allaha şükür etməlidir. Hisslər bitdikdən sonra baş verənləri isə olduğu kimi qəbul etmək lazımdır. Düşünürəm ki, həyatın müdrikliyi də məhz bundadır”, - Bela Rudenko Polad Bülbüloğlu ilə ailə həyatı barədə xatirələrini Rusiya mətbuatına sağlığında bölüşərkən belə deyib.

Müğənni keçmiş həyat yoldaşı ilə yaşadığı münasibəti peşmanlıqla deyil, həyatının gözəl və unudulmaz bir mərhələsi kimi xatırladığını vurğulayıb.

Polad Bülbüloğlunun ikinci həyat yoldaşı Gülnar Şıxəliyeva ilə tanışlığı o, mədəniyyət naziri vəzifəsində işləyərkən gerçəkləşib. Məlumatlara görə, Gülnarə Şıxəliyeva Polad Bülbüloğlu nazir işləyərkən onun referenti olub. Münasibətlər də buradan meydana gəlib.

Bu evlilikdən Leyla adlı qızı və Murtuza adlı oğlu dünyaya gəlib. Onlar da atalarının yolunu davam etdirərək musiqi dünyasına üz tutublar. Murtuza Bülbül ötən il Üzeyir Hacıbəyli adına Azərbaycan Dövlət Simfonik Orkestrinə yeni dirijor təyin olunub. Polad Bülbüloğlunun digər övladı, qızı Leylanın 27 yaşı var. Leyla da atasının yolunu davam etdirərək musiqi təhsili alıb. Məlumata görə, Leyla Bülbül ailəlidir.

2025-ci ilin fevralında Polad Bülbüloğlunun 80 illik yubileyinə həsr olunmuş konsertdə onun böyük oğlu Teymur, qızı Leyla və nəvələri də iştirak ediblər.

“Sən yalnız bizim dayağımız deyil, həm də ən yaxın dostumuzsan. Sən bizə arzularımızın ardınca getməyi və heç vaxt təslim olmamağı öyrətmisən. Sənə baxarkən biz yalnız atamızı deyil, milyonlarla insanın qəlbində silinməz iz qoymuş böyük şəxsiyyəti görürük”, – deyə sənətçinin qızı Leyla qeyd edib.

Polad Bülbüloğlunun siyasət və diplomatiya yolu

Polad Bülbüloğlu yalnız müğənni, bəstəkar və aktyor kimi deyil, həm də uzun illər dövlət idarəçiliyində fəaliyyət göstərmiş siyasətçi və diplomat kimi tanınır. Onun siyasi fəaliyyəti hələ 1980-ci illərdə başlayıb. 1987–1990-cı illərdə Bakı Şəhər Sovetinin deputatı olan Bülbüloğlu burada Mədəniyyət komissiyasına rəhbərlik edib. 1988-ci ildə isə Azərbaycan SSR-in mədəniyyət naziri təyin olunub. Azərbaycanın müstəqilliyindən sonra da bu vəzifədə fəaliyyətini davam etdirib və 2006-cı ilədək mədəniyyət naziri olub.

1995-ci ildə Polad Bülbüloğlu Milli Məclisə deputat seçilib. Bununla yanaşı, 1990-cı illərdə türk dünyasının mədəni əməkdaşlığında da fəal iştirak edib və TÜRKSOY-un baş direktoru vəzifəsini tutub.

2006-cı ildə isə onun siyasi-diplomatik fəaliyyətində yeni mərhələ başlayıb. Polad Bülbüloğlu Azərbaycanın Rusiya Federasiyasındakı fövqəladə və səlahiyyətli səfiri təyin edilib və 18 ildən artıq bu vəzifədə çalışıb. 2024-cü ildə diplomatik missiyasını başa vuraraq Azərbaycana qayıdıb və həmin il keçirilən növbədənkənar parlament seçkilərində Milli Məclisə yenidən deputat seçilib.

Şahanə Rəhimli
Musavat.com