Onlayn ictimai-siyasi qəzet
Ölkənin ən işlək küçəsində asfaltı qazdılar - Altından GÖRÜN NƏ ÇIXDI - FOTO
İngiltərənin paytaxtı Londonda aparılan infrastruktur işləri zamanı gözlənilməz tarixi kəşf edilib. Şəhərin ən işlək magistrallarından biri hesab olunan Old Kent Road küçəsində asfalt örtüyü qazılarkən, onun altında Roma imperiyası dövrünə aid təxminən 2 min illik qədim yol aşkarlanıb.
Musavat.com xəbər verir ki, məlumata görə, tapıntı Southwark rayonunda aşağı karbon emissiyalı istilik şəbəkəsinin genişləndirilməsi layihəsi çərçivəsində aparılan qazıntılar zamanı üzə çıxıb. Arxeoloqlar yolun böyük hissəsinin əsrlər boyu demək olar ki, zədələnmədən qorunub saxlandığını müəyyən ediblər.
Araşdırmalar nəticəsində qədim yolun 5,8 metr enində və 1,4 metr hündürlüyündə olduğu məlum olub. Mütəxəssislər bildirirlər ki, Roma mühəndisləri əvvəlcə sıxılmış çınqıldan möhkəm təməl qurub, sonra onu təbaşir qaya qatları ilə örtüb və ən üst hissədə yenidən qum və çınqıl qarışığından istifadə ediblər. Bu da yolun minilliklər ərzində salamat qalmasına imkan verib.
Tapılan yol qədim Britaniyanın ən mühüm nəqliyyat arteriyalarından biri olan Watling Street-in bir hissəsi hesab olunur. Bu marşrut Roma işğalından sonra, eramızın 43-cü ilindən etibarən inşa edilmiş və Dover limanını qədim Londinium şəhəri ilə birləşdirmişdi. Yol həm hərbi qüvvələrin, həm ticarət karvanlarının, həm də dövlət xəbərləşmə sisteminin əsas marşrutlarından biri olub.
Alimlər qeyd edirlər ki, müasir Old Kent Road məhz bu qədim Roma yolunun üzərində salınıb. Beləliklə, Londonda iki fərqli dövrün nəqliyyat infrastrukturu eyni xətt üzərində üst-üstə düşür. Arxeoloqlar hesab edirlər ki, kəşf şəhərin Roma dövrünə aid xəritəsinin daha dəqiq öyrənilməsinə və Londonun tarixi inkişafının araşdırılmasına mühüm töhfə verəcək.
Musavat.com
XƏBƏR LENTİ
09 Iyun 2026
ŞƏRHLƏRŞƏRH YAZ