Onlayn ictimai-siyasi qəzet
Kremlin “qorxulu yuxusu” Ukraynaya qayıdır – Putinə bəd xəbər
Donald Tramp və Volodimir Zelenski arasında 2025-ci ildə Ukrayna ilə bağlı son kritik görüş də bitdi. Əfsus ki, Florida müzakirələri və ondan az öncə Tramp-Putin telefon danışığı da müharibənin heç olmasa, Yeni il ərəfəsi dayandırlmasına gətirmədi.
Ağ Ev başçısının dediyinə görə, Rusiya ilə anlaşmanın 90 faizi artıq razılaşdırılıb. Ən mübahisəli məqam Donbasla bağlı olaraq qalır. Anlaşmanı mümkünsüz edən düyün məsələ də elə budur. Ona görə ki, söhbət Ukrayna Konstitusiyasına daban-dabana zidd bir tələbdən, “qırmızı xətt”dən, eyni zamanda, beynəlxalq hüquq üçün son dərəcə təhlükəli presedentin yaranmasından gedir.
Bunun olmaması üçün ən azından formal bir referendum keçirilməli, referendum üçün də iki aylıq atəşkəs gərəkdir. Rusiya tərəfi, Putin bunu haradasa mümkün sayıb. Ancaq referendumu maksimum qısa zamanda keçirmək şərti ilə.
Hərçənd kim zəmanət verə bilər ki, referendum Kremlin gözlədiyi cavabı verəcək? Yəqin ki, nəticə böyük ölçüdə həm də ölkənin hazırkı siyasi-hərbi rəhbərliyinin – prezidentin və Silahlı Qüvvələrin Baş Komandanı – Aleksandr Sırskinin mövqeyindən asılı olacaq...
Bu mənada referendum prezident Volodimir Zelenskiyə faktiki etimadın səviyyəsini üzə çıxara bilər. Yəni əgər elektoratın əksəriyyəti onun çağırışını dəstəkləyib mövqe bildirəcəksə, deməli, prezidentin legitimliyi ilə bağlı problem yoxdur və növbəti seçkidə də o, qələbə qazana bilər. Təbii ki, namizədliyini verərsə.
Zelenskinin əsas rəqibi qismində isə ən çox Ukraynanın Britaniyadakı səfiri, Sırskinin sələfi Valeri Zalujnının adı hallanır. Ancaq maraqlıdır ki, Zalujnı Ukraynanın ərazi bütövlüyü və suverenliyi məsələsində Zelenskidən də sərt mövqedədir, Donbasda torpaq güzəştinə qarşıdır.
Bu məqamda onun ötən ay verdiyi bir açıqlamanı yada salmağa dəyər. Təcrübəli general əminliklə söyləmişdi ki, Putinin hədəfi təkcə Donetsk və Luqansk yox, bütün Ukraynadır. O, Donetskin güzəştə getmək barədə müzakirələrin yolverilməz olduğunu söyləmişdi.
Sitat: “Bu, Ukraynanın gələcək təhlükəsizliyini təhlükə altına atar. Ukrayna Donetski əsla güzəştə getməməlidir. Münaqişə yalnız təmas xəttində dondurula bilər. Biz NATO-ya indi üzv ola bilmirik, amma üzvlük hüququmuz mütləq qorunmalıdır. Rusiya ilə müharibənin hələ uzun müddət davam etməsi mümkündür və bu səbəbə ölkənin strateji ittifaqlara açıq qalması həyati əhəmiyyət daşıyır”...
Yeri gəlmişkən, səfir Zalujnı 2026-cı ilin yanvarında Londondan Kiyevə qayıdacağını elan edə bilər. Bu haqda Radio NV-yə siyasi-diplomatik dairələrdəki mənbələrdən bəlli olub. Bildirilir ki, Kremlin “qorxulu röyası” olan keçmiş baş komandan bir neçə həftə əvvəl Zelenskiyə ölkəyə dönmək niyyətində olduğunu söyləyib. O vaxt tərəflər onun Ukraynada hansı vəzifədə fəaliyyət göstərə biləcəyi ilə bağlı müxtəlif variantları müzakirə ediblər. Ehtimal olunan vəzifələr sırasında Baş nazir və Prezident Administrasiyasının rəhbəri postları da yer alıb.
Lakin həmin vaxt Zalujnı bu təkliflərə maraq göstərməyib. Bəs bu dəfə necə? Doğrudanmı o, Zelenskinin müharibə komandasında hansısa yüksək post tutmaq üçün, indiki olduqca həssas dönəmdə ümumi işə kömək eləməkdən ötrü qayıdır, yoxsa prezidentə rəqib kimi? Zalujnının hədəfi prezident seçkisinə ön hazırlıqlar, ictimai nəbzi yoxlamaqdır, yoxsa?
Tezliklə biləcəyik. İstənilən halda Putin üçün yaxşı xəbər sayılmaz...
Zahid SƏFƏROĞLU 
XƏBƏR LENTİ
04 Iyun 2026
03 Iyun 2026
ŞƏRHLƏRŞƏRH YAZ