Onlayn ictimai-siyasi qəzet
Türkiyə ekranlarında yeni savaş: “Sevdan Bir Ateş” zirvəyə yüksəldi, “A.B.İ.” final edir
Türkiyə telekanalları yeni mövsümə iddialı seriallarla başlayıb. Ulduz aktyorlar, ailələr arasındakı münaqişələr, keçmişdən gələn sirlər və böyük eşq hekayələri yenidən ekranların əsas mövzusuna çevrilib. İlk həftələrin nəticələri isə göstərir ki, tanınmış simaların iştirakı tamaşaçını cəlb etmək üçün təkbaşına kifayət etmir: əsas sınaq güclü hekayə və rəqabətli yayım saatıdır.
Sentyabrın son həftəsində reytinq cədvəlində yeni seriallardan ən çox diqqət çəkən “Sevdan Bir Ateş” olub. “Box Office Türkiye”nin TİAK məlumatları əsasında hazırladığı, 20+ABC1 auditoriyasını əhatə edən həftəlik siyahıda ekran işinin üçüncü bölümü 9,51 reytinqlə birinci yeri tutub. “Tuzlu Kahve” 7,40 göstərici ilə ikinci, “Haysiyet” isə 3,99 reytinqlə onuncu olub.
“Sevdan Bir Ateş”: keçmişdən qayıdan sevgi və ağır hesablaşma
Murat Ünalmış və Özge Özacarın baş rollarda çəkildiyi “Sevdan Bir Ateş” keçmişdə yarımçıq qalan sevginin illər sonra yenidən alovlanmasından bəhs edir. Leylanın həyatını dəyişən ayrılıq, Mirzanın verdiyi vəd və illər sonra baş verən üzləşmə süjetin əsas xəttini təşkil edir. Şou TV-nin serialı Kapadokyada çəkilir.
Layihənin qısa müddətdə yüksəlişə çıxması göstərir ki, tamaşaçı təkcə tanış aktyor simalarına deyil, emosional gərginliyi və sirr qatını qoruyan süjetlərə də maraq göstərir. Hələ mövsümün əvvəlidir, amma “Sevdan Bir Ateş” artıq rəqiblərinə ciddi mesaj verib.
“Tuzlu Kahve”: ailə gözləntiləri ilə şəxsi seçimlər üz-üzə
Star TV-nin yeni serialı “Tuzlu Kahve” romantik komediya ilə ailə dramını birləşdirir. Yıllar sonra Türkiyəyə qayıdan Mehmet ailəsinin onun üçün qurduğu planlarla qarşılaşır. Qardaşı Muratın evlilik hazırlıqları isə Mehmetlə Derinin yollarını gözlənilməz şəkildə kəsişdirir. Keçmişdən qalan gərginliklər və gizli hisslər iki ailənin münasibətlərini dəyişir.
Serialın diqqətçəkən tərəflərindən biri də aktyor heyətidir: Eda Ece, Buğra Gülsoy, Binnur Kaya, Şevval Sam, Nebahat Çehre, Sarp Apak və Cengiz Bozkurt eyni layihədə yer alır. Həftəlik reytinq siyahısında ikinci pilləyə yüksəlməsi bu ulduz heyətinin və ailə mövzusunun tamaşaçıda qarşılıq tapdığını göstərir.
“Haysiyyət”: iki ailə, fərqli dünyalar və imkansız eşq
Kanal D-nin “Haysiyyət” serialı maddi və sosial baxımdan bir-birindən fərqli iki ailənin qarşıdurmasını mərkəzə alır. Karlıova ailəsinin oğlu Mehmetlə varlı Tarman ailəsinin qızı Simay arasındakı sevgi ailələrin köhnə hesablarını və dəyərlərini üzə çıxarır. Kerem Alışık, Doğukan Güngör, Reha Özcan və Merih Öztürk əsas rollardadır.
“Sevdan Bir Ateş” və “Tuzlu Kahve” ilə eyni axşam tamaşaçı uğrunda mübarizə aparan serialın reytinqi hələlik liderlik səviyyəsində deyil. Bununla belə, ailə dramı, sinif fərqi və romantik xətt Türkiyə seriallarının ən çox işlənən, amma izləyicini hələ də cəlb edən mövzularındandır.
“Mercan Köşk”: itkin ər, qapalı qapılar və köhnə düşmənçilik
ATV-nin “Mercan Köşk” serialında hadisələr Tarsusda, iki ailə arasında illərdir davam edən qarşıdurmanın fonunda baş verir. İtkin düşən ərini axtaran Cemre özünü sirlərlə dolu bir dünyanın içində tapır. Kubilay Aka, Hafsanur Sancaktutan və Bertan Asllani baş rolları bölüşür.
Serialın əsas cazibəsi klassik ailə dramını sirr və hesablaşma xətti ilə birləşdirməsidir: köşkdə gizlənən həqiqətlər açıldıqca, ailələr arasındakı kövrək tarazlıq da pozulur.
“Aşk ve Taht”: tarixi intriqalar və hakimiyyət savaşı
Mövsümün tarixi janrdakı iddialı layihələrindən biri “Aşk ve Taht”dır. Serial Anadolu Səlcuqlu hökmdarı I Əlaəddin Keyqubadın səkkiz illik əsirlikdən sonra taxta qayıtmaq mübarizəsini, saraydakı hakimiyyət çəkişmələrini və sevgi intriqalarını ekrana gətirir. Layihə Bozdağ Film istehsalıdır.
Bu serialla Türkiyə teleməkanı müasir ailə dramları və eşq hekayələrinin yanına tarixi-siyasi süjeti də əlavə edir. Saraydakı rəqabət, taxt iddiası və güclü qadın obrazları ekran işinin əsas xəttini təşkil edir.
“Güneşin Doğduğu Yer”: Almaniyadan Adanaya uzanan hekayə
ATV-nin digər yeni layihəsi “Güneşin Doğduğu Yer” Burak Özçivit və Beyza Gümülcineyi baş rollarda bir araya gətirir. Kenanla Leylanın Almaniyada başlayan eşq hekayəsi Adanaya, ailə sirlərinin və keçmiş hesabların içinə uzanır. Serialda sevgi ilə yanaşı, ailəni qorumaq uğrunda mübarizə də əsas mövzulardandır.
Sentyabrın 21–27-si üzrə həftəlik reytinq siyahısında serialın ikinci bölümü 4,72 göstərici ilə yeddinci pillədə qərarlaşıb. Bu nəticə layihənin tamaşaçı toplamağa başladığını göstərsə də, mövsümün sonrakı həftələrində rəqabət daha da sərtləşəcək.
Yeni seriallar üçün əsas sınaq başlayır
Yeni mövsümdə Türkiyə teleməkanında müxtəlif zövqlərə hesablanmış layihələr var: romantik komediya, ailə dramı, tarixi macəra və keçmişdən qayıdan sevgilər. Ancaq çoxsaylı yeni serialların eyni həftə efirə çıxması reytinq uğrunda mübarizəni də kəskinləşdirib.
Bunun ən diqqətçəkən nümunələrindən biri “A.B.İ.”dir. Kenan İmirzalıoğlu ilə Bergüzar Koreli yenidən tərəfdaş kimi bir araya gətirən serialın final qərarı aldığı Türkiyə mediasında yayılıb. Məlumatlara görə, layihə 23-cü bölümü ilə ekranla vidalaşacaq. Bu, yeni mövsümdə tanınmış aktyorların belə zəifləyən reytinqi təkbaşına xilas etmədiyini göstərən ən səs-küylü nümunədir.
Mövsümün ilk həftələrində “Sevdan Bir Ateş” və “Tuzlu Kahve” önə çıxsa da, tamaşaçı marağının davamlı olub-olmayacağı hələ bəlli deyil. Türkiyə seriallarının taleyini bu dəfə də ulduz heyətlərdən çox, hekayənin izləyicini növbəti bölümə qədər necə saxlayacağı müəyyən edəcək.
Musavat.com
XƏBƏR LENTİ
15 Oktyabr 2026
ŞƏRHLƏRŞƏRH YAZ