Onlayn ictimai-siyasi qəzet
Fransadan ŞOK sorğu: Le Pen rəqibini darmadağın edir – 64 faiz
Fransada 2027-ci il prezident seçkilərinə hələ aylar qalsa da, Marin Le Pen hazırda potensial namizədlər arasında aşkar favorit kimi görünür. Yeni sorğunun nəticələrinə görə, sağçı “Milli Birlik” lideri birinci turda ən yaxın rəqibini azı 16 faiz bəndi qabaqlaya bilər.
Musavat.com xarici mediaya istinadən xəbər verir ki, Toluna Harris Interactive şirkətinin RTL və M6 üçün avqustun 18-19-da keçirdiyi sorğuda beş mümkün seçki ssenarisi araşdırılıb.
Nəticələrə əsasən, Marin Le Pen birinci turda 35-38 faiz səs toplayır. Araşdırılan bütün ssenarilərdə onun göstəricisi digər namizədlərdən əhəmiyyətli dərəcədə yüksəkdir.
Ən maraqlı nəticə isə ikinci turla bağlıdır. Beş ssenaridən üçündə radikal solçu “Tabe olmayan Fransa”nın lideri Jan-Lük Melanşon ikinci yerə çıxaraq Le Penin rəqibinə çevrilir. Belə qarşıdurma baş verərsə, sorğuya görə, Le Pen 64 faiz səslə Melanşona qalib gəlir.
Həm 58 yaşlı Le Pen, həm də 74 yaşlı Melanşon prezident seçkilərində artıq üç dəfə iştirak ediblər. Le Pen son iki seçkidə ikinci tura çıxsa da, Emmanuel Makrona məğlub olub. Melanşon isə indiyədək ikinci tura keçə bilməyib.
Lakin 2027-ci il seçkiləri əvvəlkilərdən mühüm bir cəhətlə fərqlənə bilər. Fransanın siyasi mərkəzində hələlik Makronun 2017-ci ildə yaratdığı kimi geniş elektoratı birləşdirə biləcək güclü namizəd görünmür. Prezidentliyə iddialı şəxslərin sayı artıq 20-yə yaxınlaşır və mərkəzçi səslərin parçalanması Le Penin əsas üstünlüklərindən birinə çevrilə bilər.
Potensial namizədlər arasında Makronun iki keçmiş baş naziri – Eduar Filipp və Qabriel Attal da var. Sorğunun bir ssenarisində Filipp və Melanşon hərəyə 17 faiz səs toplayır, digər ssenaridə isə Filipp 19 faizlə Melanşonu qabaqlayır.
Beləliklə, hazırkı rəqəmlər qorunarsa, Fransa 2027-ci ilin yazında indiyədək görünməmiş Le Pen–Melanşon finalı ilə üzləşə bilər. Sorğunun ən diqqətçəkən nəticəsi isə başqadır: belə bir ikinci turda Le Pen artıq cüzi fərqlə deyil, böyük üstünlüklə qalib görünür.
Musavat.com
XƏBƏR LENTİ
25 Avqust 2026
01:06 Qonşu ölkədə məktəbli forması məcburiləşir – tam dəstin qiyməti bəlli oldu, imtina edənləri...
24 Avqust 2026
ŞƏRHLƏRŞƏRH YAZ