Onlayn ictimai-siyasi qəzet
ABŞ-yə keçən qeyri-leqal miqrantlar MAR-a göndəriləcək
Vaşinqton ABŞ-də sığınacaq axtaran əcnəbilərdən necə qurtulmaq barədə suala cavab tapıb.
Musavat.com xarici mediaya istinadla xəbər verir ki, arzulanmayan qonaqlar Mərkəzi Afrika Respublikasına (MAR) deportasiya ediləcək.
Bildirilir ki, Ağ Ev administrasiyası Fransanın ənənəvi olaraq güclü təsirə malik olduğu və Rusiyanın son zamanlar getdikcə daha aktivləşdiyi bu ölkə ilə münasibətləri kəskin şəkildə yaxşılaşdırmaq qərarına gəlib. ABŞ MAR-ı forpost etmək istəməsə də, ən azı oradakı mövqeyini əhəmiyyətli dərəcədə gücləndirmək istəyir.
ABŞ dövlət katibinin köməkçisinin müavini Kristian Jov Erhardtın rəhbərlik etdiyi nümayəndə heyəti MAR-ın paytaxtı Banqi şəhərinə gəlib. Onun vəzifələrinə qaçqın və miqrasiya məsələlərinə dair danışıqlar aparmaq daxildir. Bu məsələ ilə bağlı ABŞ və MAR arasında konkret sənədlər imzalanıb. Bunların arasında ABŞ-yə qanunsuz yolla gələnlərin repatriasiyası barədə razılaşma da var. Bu insanlar qaçqınların və məcburi köçkünlərin qayğısına qalmaqdan məsul olan BMT agentliyi olan Beynəlxalq Miqrasiya Təşkilatının yurisdiksiyasına veriləcək. Sadə dillə desək, qeyri-leqal miqrantlar qaçqın düşərgələrində, bəlkə də yeni bir ad altında qalacaqlar. ABŞ-nin artıq bir neçə digər Afrika ölkəsi ilə oxşar müqavilələri var: Konqo Demokratik Respublikası, Cənubi Sudan, Uqanda, Ruanda, Qana, Kamerun, Ekvatorial Qvineya və Esvatini. Lakin Mərkəzi Afrika Respublikası ilə müqavilə bunlar arasında fərqlənir.
Dünya Bankının məlumatına görə, Mərkəzi Afrika Respublikası hətta Afrika standartlarına görə də adambaşına düşən gəlirin ən aşağı olduğu ölkələr arasındadır. Amerika Birləşmiş Ştatları heç vaxt belə kasıb və qeyri-sabit bir ölkəyə sənədsiz miqrant göndərməyib.
Mərkəzi Afrika Respublikası əvvəllər Fransa müstəmləkəsi idi. 1960-cı ildə müstəqillik elan etdi. Əhalisi 6 milyondan azdır. Konstitusiyaya görə, prezident respublikasıdır. Əhalinin əksəriyyəti xristiandır.
Musavat.com
XƏBƏR LENTİ
10 Iyun 2026
09 Iyun 2026
ŞƏRHLƏRŞƏRH YAZ