Onlayn ictimai-siyasi qəzet
2026-cı ilin ən yaxşı smartfonları: Ekspertlərin tövsiyə etdiyi 5 model
"TechRadar" ekspertləri 2026-cı ilin payızında qlobal bazarda mövcud olan ən yaxşı smartfonların yenilənmiş reytinqini dərc ediblər. Siyahı cihazların həm laboratoriya şəraitində, həm də gündəlik istifadədə aparılan genişmiqyaslı sınaqlarının nəticələri əsasında hazırlanıb. Qiymətləndirməni uzun illərdir mobil texnologiyaları sınaqdan keçirən və istifadəçilərin real ehtiyaclarını nəzərə alan mütəxəssislər aparıblar.
Musavat.com xəbər verir ki, Top-5 siyahısına "Apple" və "Samsung"un flaqmanları, büdcəyə uyğun "Pixel", qatlanan cihaz və tələbələr üçün nəzərdə tutulmuş model daxildir.
iPhone 18 Pro və 18 Pro Max - "Apple" həvəskarları üçün
Hər iki cihaz intensiv yük altında belə etibarlı işləməyi təmin edən yüksək məhsuldarlıqlı "A20 Pro" prosessoru və təkmilləşdirilmiş soyutma sistemi ilə təchiz olunub. Digər diqqətçəkən yenilik dəyişən diyafraqmalı 48 MP-lik əsas kamera və əlavə edilmiş peşəkar çəkiliş tənzimləmələridir.
Reytinq müəllifləri naqilli şarjın sürətini xüsusi vurğulayırlar: batareyanı 15 dəqiqə ərzində 50%-ə qədər doldurmaq mümkündür. Adi istifadə zamanı hər iki model təxminən 30 saat işləyir. Mənfi cəhətləri isə dizaynda ciddi dəyişikliklərin olmaması və qiymətin 100 dollar artmasıdır.
Samsung Galaxy S26 Ultra - Ən yaxşı "Android" smartfon
Flaqman 120 Hz yenilənmə tezliyinə malik 6,9 düymlük "Dynamic AMOLED 2X" ekran, "Snapdragon 8 Elite Gen 5 for Galaxy" prosessoru, 12/16 GB operativ yaddaş və 5000 mAh tutumlu batareya ilə təchiz edilib.
Smartfonun əsas kamerası 200 MP-lik sensora malikdir. Onu 50 MP ultra-geniş bucaqlı, 3x optik zumlu 10 MP telefoto və 5x yaxınlaşdırmalı 50 MP telefoto kameralar müşayiət edir. Mütəxəssislərin fikrincə, məhz kamera bu modeli almaq üçün əsas səbəbdir.
Unikal xüsusiyyətlərdən biri kənardan baxanların ekrandakı məzmunu görməsini məhdudlaşdıran "Privacy Display" texnologiyasıdır. Telefon çoxlu Sİ (süni intellekt) funksiyaları və 7 illik yenilənmə dəstəyi alıb. Nöqsan kimi korpusda titandan imtina edilməsi və dizayn dəyişikliyinin cüzi olması göstərilir.
Google Pixel 10a - Ən yaxşı əlçatan smartfon
Başlanğıc qiyməti 499 avro olan bu model 120 Hz tezlikli 6,3 düymlük OLED ekran, "Tensor G4" çipi, 8 GB operativ yaddaş və 5100 mAh batareya təklif edir. Arxa paneldə 48 MP əsas və 13 MP ultra-geniş bucaqlı kamera yerləşdirilib.
İcmalçılar fotoşəkillərin emalını və Sİ funksiyalarını modelin ən güclü tərəfi hesab edirlər: istifadəçi sadəcə çəkiliş edir, ağıllı alqoritmlər isə fotosu avtomatik təkmilləşdirir. Əsas irad əvvəlki nəsillə müqayisədə köklü fərqlərin olmamasıdır. Bununla belə, "Google"un təklif etdiyi 7 illik "Android" və təhlükəsizlik yenilənmələri cihazı uzunmüddətli istifadə üçün cazibədar edir.
Samsung Galaxy Z Fold 8 Ultra - Ən yaxşı qatlanan smartfon
Qatlanmış vəziyyətdə 6,5 düymlük ekrana malik olan cihaz açıldıqda 8 düymlük planşetə çevrilir. Gövdənin qalınlığı açıq şəkildə cəmi 4,1 mm-dir. Smartfon "Snapdragon 8 Elite Gen 5 for Galaxy" çipi, 16 GB-a qədər operativ və 1 TB-a qədər daxili yaddaşla təchiz olunub. 200 MP-lik əsas kamera qatlanan smartfonlar seqmentində ciddi sıçrayış hesab olunur.
Ekspertlər daxili displeydə qat yerinin praktiki olaraq görünməməsini, yüksək məhsuldarlığı və təkmilləşdirilmiş foto emalını yüksək qiymətləndirirlər. Mənfi tərəfləri yüksək qiyməti (2100 dollardan başlayan) və cihazın hamar səthdə rahat dayanmasına mane olan kamera çıxıntısıdır.
iPhone 17 - Tələbələr və gənclər üçün ən yaxşı seçim
2025-ci ilin bazis "iPhone" modeli 120 Hz yenilənmə tezliyinə və "Always-On" funksiyasına malik 6,3 düymlük "Super Retina XDR" ekran, "A19" prosessoru və bazardakı ən yaxşı ön kameralardan birini alıb. Baza yaddaş həcmi isə 256 GB-dan başlayır.
Möhkəm korpus, aktiv istifadədə belə bir günlük batareya ömrü və sürətli şarj cihazın əsas üstünlükləridir. Smartfon "Pro" modellərinin bir çox imkanlarını daha münasib qiymətə təqdim edir. Bu səbəbdən "TechRadar" modeli tələbələrə, gənclərə və flaqman funksiyalarına artıq pul xərcləmək istəməyənlərə tövsiyə edir.
Musavat.com
XƏBƏR LENTİ
14 Oktyabr 2026
ŞƏRHLƏRŞƏRH YAZ