Onlayn ictimai-siyasi qəzet
Norveçin keçmiş baş naziri Epşteyn işi üzrə istintaqa cəlb olunub
Norveç polisi keçmiş ölkənin keçmiş baş naziri Torbyorn Yaqlandı korrupsiya şübhəsi ilə istintaqa çəkib.
Musavat.com xarici mediaya isinadla xəbər verir ki, qərar mərhum maliyyəçi Cefri Epşteynin işi ilə bağlı bu yaxınlarda dərc olunmuş materialları nəzərdən keçirdikdən sonra verilib.
75 yaşlı Yaqland Norveçin baş naziri (1996-1997) və xarici işlər naziri (2000-2001) vəzifələrində çalışıb. 2009-cu ildən 2019-cu ilə qədər o, Avropa Şurasının baş katibi vəzifəsini tutub, 2009-cu ildən 2015-ci ilə qədər Nobel Sülh Mükafatını verən komitəyə rəhbərlik edib.
"Yaqlandın Nobel Komitəsinin sədri və Avropa Şurasının baş katibi vəzifələrini tutduğunu nəzərə alaraq, hesab edirik ki, məxfilikdən çıxarılan sənədlərin əhatə etdiyi dövrdə araşdırma üçün ciddi əsaslar var", - deyə Oekokrim rəhbəri Paal Løset bildirib.
Müstəntiqlər Yaqlandın bu vəzifələrdə olarkən hədiyyələr qəbul edib-etmədiyini, səyahətlərə gedib-getmədiyini və ya kredit götürüb-götürmədiyini araşdıracaqlar.
Polis həmçinin Norveç Xarici İşlər Nazirliyindən Yaqlandın əvvəlki diplomatik xidmətindən aldığı diplomatik toxunulmazlığını ləğv etməsini istəyib. Xarici İşlər Nazirliyi tələbi təmin edib.
Yaqlanda qarşı hələlik heç bir konkret ittiham irəli sürülməyib. Onun vəkili Anders Brøvset polislə əməkdaşlıq etməyə hazır olduğunu bildirib.
"İndiyə qədər gördüklərimizə əsasən, bu işin nəticəsindən əminik", - deyə o, “Röyter” agentliyinə bildirib.
T.Yaqland, Norveçdə Epşteyn ilə əlaqələri səbəbindən ciddi ictimai nəzarətə məruz qalan bir neçə tanınmış ictimai xadimdən biridir.
Maliyyəçinin sənədlərində həmçinin 2008-ci ildə cinsi cinayətlərə görə ilk dəfə məhkum edildikdən sonra belə Epşteynlə sıx yazışma apardığı ortaya çıxan şahzadəsi Mette-Maritdən də bəhs olunur. Şahzadə artıq Epşteynlə əlaqəsinə görə kral ailəsindən üzr istəyib.
Mette-Marit açıqlamasında bildirib: "Epşteynin keçmişi ilə bağlı daha ətraflı araşdırma aparmadığım və onun necə bir insan olduğunu daha tez başa düşmədiyim üçün məsuliyyət daşımalıyam".
Musavat.com
XƏBƏR LENTİ
05 Iyun 2026
ŞƏRHLƏRŞƏRH YAZ