Onlayn ictimai-siyasi qəzet
Epşteyn işi: Bill Klintonun iştirak etdiyi eyş-işrət gecələrinin fotoları yayıldı
ABŞ-nin keçmiş prezidenti Bill Klinton ilə qlobal seks cinayətləri qalmaqalının əsas fiqurları – maliyyəçi Cefri Epşteyn və britaniyalı Gisleyn Maksell arasındakı münasibətlər yenidən gündəmə gəlib.
Musavat.com xəbər verir ki, ABŞ Ədliyyə Nazirliyi və Konqres komitəsinə təqdim edilən yeni fotoşəkillər və elektron məktublar keçmiş prezidentin həmin çevrə ilə əlaqələrinin miqyasına dair əlavə detallar üzə çıxarıb.
Yayılan materiallar arasında Klintonun Maksvel ilə birlikdə gecə üzgüçülüyü etdiyi görüntülər, jakuzidə istirahət edərkən çəkilmiş fotolar və Epşteynlə birlikdə müxtəlif beynəlxalq tədbirlərdə, o cümlədən Honkonqda konsert zamanı səhnə arxasında çəkilmiş şəkillər də var. Bu görüntülər keçmiş prezidentin 2000-ci illərin əvvəllərində Epşteynin sosial və maliyyə dairələri ilə yaxın təmasda olduğunu göstərir.
Uçuş qeydlərinə əsasən, Klinton 2002-2003-cü illərdə Epşteynin şəxsi təyyarəsi ilə ən azı 24 dəfə səyahət edib. Bu səfərlər Avropa, Afrika, Asiya və Rusiyanı əhatə edib. Keçmiş prezident həmin uçuşların əsasən özünün xeyriyyə fəaliyyəti və Klinton Foundation layihələri ilə bağlı olduğunu bildirib.
Klintonun sözçüsü Angel Urena bildirib ki, keçmiş prezident Epşteynin sonradan üzə çıxan cinayətləri barədə məlumatlı olmayıb və onun adasında heç vaxt olmayıb. Rəsmi açıqlamada vurğulanır ki, Klinton Epşteynə qarşı ilk cinayət ittihamları irəli sürüldükdən sonra onunla əlaqəni kəsib.
Yeni açıqlanan elektron məktublar Maksvelin Klintonun yaxın köməkçisi Doug Band ilə intensiv yazışmalar apardığını göstərir. Bu yazışmalar Klinton üçün görüşlərin təşkili, donorların cəlb edilməsi və Epşteynin təyyarəsi ilə səfərlərin koordinasiyası kimi məsələləri əhatə edib.
Maksvel ABŞ Ədliyyə Nazirliyinə verdiyi ifadədə Klinton ilə Epşteyn arasında əlaqələrin qurulmasında mühüm rol oynadığını etiraf edib. Onun sözlərinə görə, Epşteynin təyyarəsinin Klintonun istifadəsinə verilməsi təşəbbüsü də məhz onun vasitəsilə həyata keçirilib. ABŞ Konqresinin respublikaçıların rəhbərlik etdiyi komitəsi yeni yayımlanan materiallar əsasında Klintonun Epşteynlə əlaqələrinin detalları ilə bağlı sorğular aparmağa hazırlaşır. Bu, keçmiş prezidentin adının Epşteyn qalmaqalı çərçivəsində yenidən rəsmi müzakirə mövzusuna çevrilməsi deməkdir.
Bununla belə, açıqlanan sənədlərdə Klintonun hər hansı cinayətdə iştirak etdiyini göstərən birbaşa sübut yoxdur və Epşteynin qurbanları tərəfindən ona qarşı hüquqi ittiham irəli sürülməyib.
Epşteyn 2008-ci ildə yetkinlik yaşına çatmayan şəxsi fahişəliyə cəlb etməkdə günahını etiraf etmiş, 2019-cu ildə isə yeni seks alveri ittihamları üzrə məhkəməni gözləyərkən həbsxanada ölü tapılmışdı. Onun yaxın tərəfdaşı Gisleyn Maksvel isə 2021-ci ildə yeniyetmə qızların cinsi istismarı və insan alverində iştiraka görə məhkum olunaraq uzunmüddətli həbs cəzası alıb.
Klinton isə sonradan yazdığı xatirələrində Epşteynlə tanışlığına görə peşman olduğunu bildirərək, “Kaş ki, onunla heç vaxt görüşməsəydim”, sözlərini işlədib.
E.Məmmədəliyev,
Musavat.com
XƏBƏR LENTİ
05 Iyun 2026
ŞƏRHLƏRŞƏRH YAZ