Onlayn ictimai-siyasi qəzet
ABŞ Cənubi Qafqazda yeni prioritetlər seçir: Gürcüstan niyə kənarda qalır?
Vaşinqtonun Cənubi Qafqaz siyasətində son dəyişikliklər regionda diqqətlə izlənilir.
Musavat.com xarici agentliklərə istinadən xəbər verir ki, Carnegie Russia Eurasia Center-in təhlilində ABŞ-ın son dövrlər Cənubi Qafqaza artan marağı fonunda Gürcüstanın diplomatik gündəmdən kənarda qalması diqqətə çatdırılır.
Təhlildə qeyd olunur ki, ABŞ-ın vitse-prezidenti Cey Di Vensin son səfəri regionda geniş rezonans doğurub. O, Bakı və İrəvanda danışıqlar aparsa da, Tiflis marşrutdan kənarda qalıb. Bu detal müəlliflərin fikrincə, Vaşinqtonun Gürcüstana münasibətində son illərdə baş verən dəyişikliklərin simvolu kimi qiymətləndirilir.
Əvvəllər Gürcüstan postsovet məkanında ABŞ-ın əsas tərəfdaşlarından biri, “demokratiya nümunəsi” kimi təqdim olunurdu və Qərbdə xüsusi statusa malik idi. Bu mövqe Vaşinqtonun davamlı siyasi və maliyyə dəstəyi ilə müşayiət olunurdu. Lakin son illərdə Gürcüstanın daxili siyasi prosesləri və demokratik göstəricilərlə bağlı tənqidlər fonunda bu imic zəifləyib.
Carnegie analitikləri bildirirlər ki, hazırda ABŞ xarici siyasətində prioritetlər dəyişib. Əgər əvvəl demokratiyanın təşviqi və institusional islahatlar əsas meyar idisə, indi diqqət daha çox konkret iqtisadi və strateji layihələrə yönəlib. Enerji, logistika və təhlükəsizlik sahələrində real və sürətli nəticə verən təşəbbüslər Vaşinqton üçün daha cəlbedici hesab olunur.
Bu kontekstdə Azərbaycan və Ermənistan ön plana çıxır. Ermənistan Qərblə münasibətləri gücləndirməyə və Rusiyadan asılılığı azaltmağa çalışır. Azərbaycan isə enerji resursları və regiondan keçən nəqliyyat marşrutları baxımından strateji tərəfdaş kimi qiymətləndirilir.
Təhlildə vurğulanır ki, ABŞ-ın təşəbbüsü ilə formalaşdırılan regional əməkdaşlıq platformalarında – o cümlədən enerji və infrastruktur layihələrinin müzakirə olunduğu mexanizmlərdə – Gürcüstanın adı ön planda çəkilmir. Bu isə Tiflisin əvvəlki illərlə müqayisədə daha zəif mövqedə olduğunu göstərir.
Ekspertlərin fikrincə, Gürcüstanın Vaşinqtonun diqqətini yenidən cəlb etməsi üçün həm demokratik institutların gücləndirilməsi, həm də ABŞ üçün strateji əhəmiyyət daşıyan konkret layihələrin irəli sürülməsi vacibdir. Hazırda belə təşəbbüslərin görünməməsi Gürcüstan–ABŞ münasibətlərinin gələcəyini qeyri-müəyyən edir.
Beləliklə, Carnegie-nin təhlili göstərir ki, ABŞ-ın Cənubi Qafqaz siyasətində ideoloji yanaşmadan daha çox praqmatik maraqlar ön plana çıxır və bu dəyişiklik region ölkələri üçün fərqli nəticələr doğurur.
Musavat.com
XƏBƏR LENTİ
05 Iyun 2026
04 Iyun 2026
ŞƏRHLƏRŞƏRH YAZ