Onlayn ictimai-siyasi qəzet
Moskvadakı partlayışda rusiyalı generalın kürəkəni də ölüb
Moskvanın Balzi Rossi restoranında baş verən partlayış zamanı həlak olanlardan birinin Rusiya Hərbi-Kosmik Qüvvələrinin baş komandanı, general-polkovnik Aleksandr Çaykonun kürəkəni olduğu bildirilir.
Musavat.com xarici agentliklərə istinadən xəbər verir ki, generalın kürəkəni Daniil Peredri 1 avqust tarixində baş vermiş partlayış nəticəsində həyatını itirib. Bu iddia dövlət məlumat bazalarına əsaslandırılır. Bildirilir ki, Peredriyə məxsus şəxsi sənədlərdən biri "1 avqust tarixindən etibarsızdır" qeydi ilə ləğv edilib.
Partlayış Aleksandr Çaykonun 55 illik yubileyi münasibətilə təşkil olunmuş qapalı tədbir zamanı baş verib.
Məlumata görə, generalın qızı Mariya Peredri (2025-ci ildə soyadını dəyişib) hadisə zamanı müxtəlif xəsarətlər alıb.
Rusiya Milli Antiterror Komitəsinin (NAK) məlumatına əsasən, partlayıcı qurğunu hədiyyə qutusunda gətirən kuryeri girişdə mühafizə əməkdaşları saxlayıb. Partlayıcının işə düşməsi nəticəsində hadisə yerində kuryer, federal mühafizə xidməti əməkdaşı və qonaqlardan biri həlak olub. Sonradan xəstəxanada ölən yaralılarla birlikdə qurbanların sayı beş nəfərə çatıb.
Rusiya Xarici İşlər Nazirliyi hadisəni "italiyalıları qorxutmaq cəhdi" kimi qiymətləndirib.
Lakin İtaliyanın xarici işlər naziri Antonio Tayani bu iddianı rədd edərək, belə açıqlamanı "tamamilə cəfəngiyat" adlandırıb.
Bununla yanaşı, "Agentstvo" yazır ki, partlayış zamanı həlak olduğu iddia edilən Rusiya Müdafiə Nazirliyinin генерал-mayorunun dəfn mərasimi Moskvada yüksək məxfilik şəraitində keçirilib.
Məlumata görə, dəfn mərasimi Troekurov qəbiristanlığının hüquq-mühafizə orqanları və müdafiə sənayesi nümayəndələri üçün nəzərdə tutulmuş qapalı hissəsində baş tutub. Tədbir gücləndirilmiş təhlükəsizlik tədbirləri altında keçirilib.
Nəşrin iddiasına görə, Rusiya rəsmiləri Balzi Rossi restoranındakı partlayış zamanı yaralanan və ya həlak olan yüksəkvəzifəli qonaqların tam siyahısını ictimaiyyətdən gizli saxlamağa davam edir. Buna görə də insident zamanı ölən və yaralanan yüksək rütbəli şəxslərin dəqiq sayı hələ də rəsmi şəkildə açıqlanmayıb.
Musavat.com
XƏBƏR LENTİ
15 Avqust 2026
ŞƏRHLƏRŞƏRH YAZ