Onlayn ictimai-siyasi qəzet
Gəncədə zibillikdə ölü uşaq tapıldı – Prokurorluq araşdırmaya başladı
Gəncə şəhərində zibil poliqonunda ölü dölün aşkar edilməsi ilə bağlı prokurorluq araşdırmaya başlayıb. Hadisənin hansı şəraitdə baş verdiyi və dölün poliqona necə düşdüyü araşdırılır.
Musavat.com xəbər verir ki, Baş Prokurorluğun Mətbuat xidmətindən bildirilib ki, hadisə 19 avqust 2026-cı il tarixində Gəncə şəhərinin Cavadxan qəsəbəsində yerləşən zibil poliqonunda baş verib.
Məlumata görə, poliqonda ölü dölün aşkar edilməsi faktı üzrə Gəncə şəhər prokurorluğunda araşdırma aparılır.
Prokurorluq əməkdaşları hadisə yerinə baxış keçirib. Eyni zamanda aşkar edilmiş ölü dölə baxış keçirilib və onun ölüm səbəbinin, habelə digər mühüm halların müəyyənləşdirilməsi üçün məhkəmə-tibbi ekspertizası təyin olunub.
Hadisənin bütün təfərrüatlarının müəyyənləşdirilməsi məqsədilə digər zəruri prosessual hərəkətlərin də həyata keçirildiyi bildirilir.
Hazırda əsas suallar dölün kimə məxsus olması, onun hansı şəraitdə dünyaya gəlməsi və ya tələf olması, eləcə də zibil poliqonuna necə düşməsi ətrafındadır. Bu suallara məhkəmə-tibbi ekspertizasının nəticələri və aparılan araşdırmanın digər materialları əsasında aydınlıq gətiriləcəyi gözlənilir.
Baş Prokurorluğun məlumatına görə, araşdırmanın nəticəsindən asılı olaraq hadisəyə hüquqi qiymət veriləcək.
Hazırda faktla bağlı hər hansı şəxsin təqsirləndirilməsi və ya cinayət məsuliyyətinə cəlb olunması barədə rəsmi məlumat açıqlanmayıb.
E.Məmmədəliyev,
Musavat.com
XƏBƏR LENTİ
20 Avqust 2026
ŞƏRHLƏRŞƏRH YAZ