Onlayn ictimai-siyasi qəzet
Dunay daha bir ölkəyə enerji böhranı gətirir
Yaxın günlərdə Serbiya ərazisində Dunay çayı boyu gəmiçilik dayandırılacaq.
Musavat.com xəbər verir ki, məlumatı Serbiya prezidenti Aleksandr Vuçiç açıqlayıb.
Onun sözlərinə görə, Pancevodakı neft emalı zavoduna xammal tədarükü də risk altındadır: "Suyun səviyyəsinin aşağı olması səbəbindən neft emalı zavodunda problemlərlə qarşılaşdıq. Böhran idarəetmə qrupunun iclası planlaşdırılıb və biz əlimizdən gələni edəcəyik. Ümid edirəm ki, neft emalı zavodunu bağlamaq məcburiyyətində qalmayacağıq. Bir-iki gün ərzində Dunay artıq gəmiçilik üçün yararlı olmayacaq. Bu gün də gəmiçilik üçün yararlıdır, amma gəmilərin yükünü, daha dəqiq desək, yükü 50 faiz azaltmalıyıq".
Söhbət Belqrad yaxınlığındakı Pancevo şəhərində NİS şirkətinə məxsus neft emalı zavodundan gedir. Zavod Tamiş çayı ilə Dunayın qovuşduğu yerdə yerləşir.
Serbiyanın Baş naziri Djuro Macut daha əvvəl bildirib ki, ölkənin enerji sektorundakı vəziyyət Dunaydakı su elektrik stansiyalarından elektrik enerjisi istehsalının az olması səbəbindən çətindir və buna görə də vətəndaşlar elektrik enerjisindən daha səmərəli istifadə etməlidirlər. O, həmçinin qeyd edib ki, 3 avqustda milli fövqəladə hallara cavab heyətinin təcili iclası keçiriləcək. Bundan əvvəl Serbiya Elektrik Enerji Şirkəti Dunay çayındakı Cerdap 1 və Cerdap 2 su elektrik stansiyalarının çay axınının az olması səbəbindən müvafiq olaraq güclərinin yalnız 20 və 30 faizi ilə işlədiyini bildirmişdi.
Musavat.com
XƏBƏR LENTİ
03 Avqust 2026
ŞƏRHLƏRŞƏRH YAZ