Onlayn ictimai-siyasi qəzet
D-8-də 30 ildən sonra ilk yeni üzv: Niyə məhz Azərbaycan?
Azərbaycanın D-8-ə üzv qəbul edilməsi ölkənin beynəlxalq və müsəlman dünyasındakı siyasi çəkisinin artmasının göstəricilərindən biridir. Prezident İlham Əliyev Yeni Azərbaycan Partiyasının VIII qurultayında çıxışı zamanı Azərbaycanın 30 illik tarixə malik D-8 təşkilatına 8 üzvdən sonra qəbul edilən ilk yeni ölkə olduğunu xüsusi vurğulayıb. Dövlət başçısı bununla yanaşı, Azərbaycanın İslam Əməkdaşlıq Təşkilatı ilə sıx əlaqələrinə və gələn il ölkəmizdə keçiriləcək Zirvə Görüşünə diqqət çəkib.
Prezidentin çıxışında diqqətçəkən əsas məqamlardan biri isə İslam dünyasında davam edən qarşıdurmalarla bağlı mesajı olub. İlham Əliyev müsəlman ölkələrinin bir-biri ilə müharibə aparmasından təəssüfünü ifadə edib və Azərbaycanın İslam həmrəyliyinin gücləndirilməsi istiqamətində ardıcıl siyasət apardığını bildirib. Azərbaycanın həm tarixi, həm siyasi mövqeyi, həm də regional imkanları ona İslam dünyasında birləşdirici rol oynamaq üçün əlavə imkanlar yaradır.
Azərbaycanın D-8-ə qoşulması və gələn il İslam Əməkdaşlıq Təşkilatının Zirvə Görüşünə ev sahibliyi etməsi Bakının müsəlman dünyasında artan diplomatik rolunu daha da önə çıxarır. Prezidentin mesajlarından aydın görünür ki, Azərbaycan yalnız təşkilatların üzvü olmaqla kifayətlənmir, həm də İslam dünyasında həmrəyliyin və əməkdaşlığın gücləndirilməsi prosesində fəal rol oynamağa çalışır.
Azərbaycanın D-8-də ilk yeni üzv kimi qəbul edilməsi və Bakının qarşıdakı Zirvə Görüşünə ev sahibliyi etməsi İslam dünyasında ölkəmizin siyasi rolunu hansı səviyyəyə yüksəldə bilər?
Milli Məclisin deputatı Könül Nurullayeva Musavat.com-a bildirdi ki, Azərbaycanın D-8 İqtisadi Əməkdaşlıq Təşkilatına üzv qəbul edilməsi ölkənin müsəlman dünyasındakı nüfuzunun göstəricisidir: " Prezident İlham Əliyev Yeni Azərbaycan Partiyasının VIII Qurultayında çıxışı zamanı diqqətə çatdırıb ki, 30 il ərzində səkkiz üzvlə fəaliyyət göstərən D-8-ə bu müddət ərzində yeni üzv qəbul edilməyib və Azərbaycan təşkilata qoşulan ilk yeni ölkə olub. Bu faktın siyasi əhəmiyyəti yalnız təşkilata yeni üzv qəbul edilməklə məhdudlaşmır. D-8 Türkiyə, İran, Pakistan, Banqladeş, İndoneziya, Malayziya, Misir və Nigeriya kimi müsəlman dünyasının böyük ölkələrini bir araya gətirən platformadır. Azərbaycanın bu quruma daxil olması Bakının həm İslam ölkələri ilə iqtisadi əlaqələrinin, həm də siyasi dialoq imkanlarının genişlənməsi üçün əlavə çoxtərəfli kanal yaradır.
Məlum olduğu kimi təşkilatın fəaliyyət istiqamətləri ticarət, investisiya, sənaye, enerji, kənd təsərrüfatı, nəqliyyat və digər sahələrdə əməkdaşlığı əhatə edir. Buna görə də üzvlük Azərbaycanın müsəlman ölkələri ilə iqtisadi münasibətlərinin daha sistemli şəkildə inkişaf etdirilməsi üçün yeni imkanlar yaradacaq. Burada Azərbaycanın coğrafi mövqeyi də xüsusi əhəmiyyət daşıyır. Bakı Avropa ilə Asiya arasında nəqliyyat və enerji bağlantılarının mühüm qovşaqlarından biridir. Bu amil D-8 çərçivəsində iqtisadi əməkdaşlığın ikitərəfli münasibətlərlə yanaşı, daha geniş regional layihələr müstəvisində inkişaf etdirilməsi üçün zəmin yaradır".
Parlamentari onu da diqqətə çatdırdı ki, Azərbaycanın D-8-ə üzvlüyündən əvvəl Bakıda təşkilatın müxtəlif tədbirlərinin keçirilməsi bu platformada fəal iştiraka hazırlıq prosesinin artıq müəyyən təcrübəyə malik olduğunu göstərir: "2025-ci ildə Bakıda D-8 Gənclər Dialoqu və ilk D-8 Media Forumu keçirilib. Gələn il Azərbaycanda İslam Əməkdaşlıq Təşkilatının Zirvə Görüşü keçiriləcək. Dövlət başçısı bu tədbirin İslam dünyasında mürəkkəb proseslərin getdiyi bir dövrə təsadüf etdiyini və Azərbaycanın İslam həmrəyliyinin gücləndirilməsi istiqamətində səylər göstərdiyini vurğuladı. Azərbaycan İslam dünyasında “birləşdirici rol” oynayır. Bu, xüsusilə müsəlman ölkələri arasında fikir ayrılıqlarının və qarşıdurmaların mövcud olduğu bir şəraitdə diplomatik dialoqun əhəmiyyətini ön plana çıxarır. Təşkilatlarda üzvlük və tədbirlərə ev sahibliyi siyasi imkan yaradır, həmin imkanların real təsirə çevrilməsi isə diplomatik təşəbbüslərin məzmunundan asılıdır.
Azərbaycanın son illərdə müxtəlif çoxtərəfli formatlarda fəallığının artması fonunda D-8 üzvlüyü də bu siyasətin davamı kimi təqdim olunur. Cənab Prezidentin çıxışında Azərbaycanın Mərkəzi Asiya Məşvərət Görüşlərinə tamhüquqlu üzv qəbul edilməsinin və müxtəlif dövlətlərlə strateji tərəfdaşlıq münasibətlərinin qurulmasının da qeyd edilməsi ölkənin müxtəlif regional platformalarda iştirakını xarici siyasətin mühüm istiqaməti kimi göstərir. Bu mənada Azərbaycanın D-8-ə daxil olması yalnız yeni bir beynəlxalq təşkilata üzvlük deyil. Bu, Bakının İslam dünyası ilə münasibətlərində yeni diplomatik kanalın açılmasıdır. İslam Əməkdaşlıq Təşkilatının Zirvə Görüşü isə həmin kanalın siyasi gündəliyinin daha geniş auditoriyaya çıxarılması üçün imkan yarada bilər. Azərbaycanın D-8-də ilk yeni üzv kimi qəbul edilməsi və Bakının qarşıdakı İslam Əməkdaşlıq Təşkilatı Zirvə Görüşünə ev sahibliyi etməsi ölkənin İslam dünyasındakı diplomatik iştirakının genişlənməsi baxımından əhəmiyyətli hadisələrdir. Bu proseslər Azərbaycanın qarşısında yeni iqtisadi, siyasi və diplomatik imkanlar açır".
Cavanşir Abbaslı
Musavat.com
XƏBƏR LENTİ
14 Oktyabr 2026
13 Oktyabr 2026
ŞƏRHLƏRŞƏRH YAZ