Onlayn ictimai-siyasi qəzet
Rusiyada müxalifəti də hakimiyyət maliyyələşdirirmiş?
Rusiyada özünü hakimiyyətə müxalifət kimi təqdim edən parlament partiyalarının maliyyələşdirilməsi ilə bağlı diqqətçəkən məlumatlar üzə çıxıb. “Proyekt”in araşdırmasına görə, Kommunist Partiyası, “Ədalətli Rusiya” və “Yaşıllar” hakim “Vahid Rusiya”nın maliyyə rəhbərliyi ilə sıx əlaqələri olan eyni strukturdan milyonlarla rubl əldə ediblər.
Musavat.com “Proyekt”in “Poputçiki” araşdırmasına istinadən xəbər verir ki, söhbət “Mitakom” qeyri-kommersiya təşkilatından gedir.
Açıqlanan məlumatlara görə, “Mitakom” 2018-ci ildə Rusiya Kommunist Partiyasına 30 milyon rubl köçürüb.
2021-ci ildə “Yaşıllar” Partiyası həmin strukturdan 43,3 milyon rubl alıb.
2017-ci ildə Ryazan vilayətində keçirilən qubernator seçkilərində isə “Ədalətli Rusiya”nın namizədi Sergey Pupkovun seçki kampaniyasına “Mitakom” tərəfindən 6 milyon rubl ayrılıb. Pupkov seçkilərdə səslərin 1,5 faizindən də azını toplayıb.
Maraqlıdır ki, eyni struktur təkcə formal müxalifəti deyil, hakimiyyətin namizədlərini də maliyyələşdirib.
2018-ci ildə Moskva meri seçkilərində Sergey Sobyaninin seçki fonduna “Mitakom”dan 7,5 milyon rubl daxil olub. 2017-ci ildə Perm diyarının qubernatoru seçilən Maksim Reşetnikov isə həmin strukturdan 3 milyon rubl əldə edib.
“Proyekt” “Mitakom”u “Vahid Rusiya”nın qeyri-rəsmi “pul kisəsi” ola biləcək strukturlardan biri kimi xarakterizə edir və bunun üçün təşkilatın hakim partiyanın maliyyə rəhbərliyi ilə əlaqələrinə diqqət çəkir.
Bu əlaqələrin mərkəzində Dövlət Dumasının deputatı Natalya Orlovanın adı keçir.
Orlova “Vahid Rusiya” Mərkəzi İcraiyyə Komitəsi rəhbərinin maliyyə məsələlərinə cavabdeh müavinidir. 2021-ci ildən isə Dövlət Dumasının deputatıdır.
Araşdırmada istifadə edilən sərhəd xidməti məlumatlarına görə, Orlova “Mitakom”un direktoru Yevgeni Şeqolevlə birlikdə şəxsi təyyarələrlə xaricə səfərlər edib. Onların 2018-ci ildə Almaniyaya, 2019-cu ildə isə İtaliyaya eyni biznes-jetlə uçduqları bildirilir.
Şeqolevin özü də “Vahid Rusiya”nın maliyyə strukturlarında çalışıb. Açıq mənbələrdə onun partiyanın Mərkəzi İcraiyyə Komitəsinin maliyyə-təsərrüfat idarəsində deputat birlikləri ilə qarşılıqlı əlaqələrin təmin edilməsinə cavabdeh departamentə rəhbərlik etdiyi göstərilir.
2021-ci il Dövlət Duması seçkilərində Mərkəzi Seçki Komissiyası Orlova və Şeqolevi “Vahid Rusiya”nın maliyyə məsələləri üzrə səlahiyyətli nümayəndələri arasında eyni siyahıya daxil edib.
Araşdırmada daha bir ad – Zinaida Kavaly auskayte də keçir. Onun da Orlova ilə şəxsi təyyarələrdə Almaniya və İtaliyaya uçduğu və “Mitakom”la əlaqəli olduğu bildirilir.
“Proyekt” müxtəlif məlumatların təhlilinə əsaslanaraq Kavaly auskaytenin Natalya Orlovanın qızı ola biləcəyini ehtimal edir. Bu qohumluq əlaqəsi təqdim olunan materialda rəsmi şəkildə təsdiqlənmiş fakt kimi göstərilmir.
Kavaly auskaytenin “Vahid Rusiya” ilə əlaqəli müxtəlif strukturlarda çalışdığı, həmçinin seçki kampaniyalarının müşayiəti üçün xidmət göstərən “Moi vıborı” platformasını hazırlayan şirkətə sahib olduğu bildirilir.
“Proyekt”in araşdırması bununla da məhdudlaşmır.
Sərhəd xidmətindən sızdığı bildirilən məlumatların təhlili göstərib ki, “Vahid Rusiya”, Kommunist Partiyası, LDPR, “Ədalətli Rusiya” və “Yeni insanlar” partiyalarından olan deputatlar müxtəlif vaxtlarda eyni biznes-jetlərlə birlikdə səfər ediblər.
Araşdırma müəllifləri bəzi belə uçuşların xərcini LDPR lideri Leonid Slutski tərəfindən ödənilmiş ola biləcəyini ehtimal edirlər.
“Proyekt” bütün bu məlumatları Rusiyada “sistem müxalifəti” adlandırılan partiyalarla hakimiyyət arasındakı münasibətlərin rəsmi siyasi qarşıdurmadan daha yaxın ola biləcəyinin göstəricisi kimi təqdim edir.
Ən diqqətçəkən detal isə maliyyə axınlarıdır: araşdırmaya əsasən, hakimiyyət namizədlərinə pul verən və “Vahid Rusiya”nın maliyyə rəhbərliyi ilə əlaqəli şəxslər tərəfindən idarə olunan eyni struktur müxtəlif illərdə kommunistlərə, “Yaşıllar”a və “Ədalətli Rusiya” təmsilçisinə də milyonlarla rubl ayırıb.
Musavat.com
XƏBƏR LENTİ
10 Oktyabr 2026
ŞƏRHLƏRŞƏRH YAZ