Onlayn ictimai-siyasi qəzet
Rubinyan Moskvaya meydan oxudu
Ermənistan rəhbərliyi Moskvanın son sərt bəyanatlarına cavab verib. İrəvan Rusiya ilə münasibətləri pisləşdirmək niyyətində olmadığını bildirsə də, Avropa İttifaqına üzvlük üçün müraciətin referendumdan əvvəl verilməli olduğunu açıq şəkildə bəyan edib.
Musavat.com xəbər verir ki, bunu Ermənistan parlamentinin sədri Ruben Rubinyan jurnalistlərin suallarını cavablandırarkən deyib.
Rubinyan Rusiya Dövlət Dumasının sədri Vyaçeslav Volodinin Ermənistanla bağlı son açıqlamasına münasibət bildirib. Onun sözlərinə görə, münasibətlərin pisləşməsi üçün addımlar atan tərəf Ermənistan deyil.
“Biz son dərəcə səmimiyik və həmişə səmimi olmuşuq. Rusiya Federasiyası ilə münasibətlərin pisləşməsi üçün hansısa addımlar atan biz deyilik. Əksinə, normal, mehriban qonşuluq və dostluq münasibətlərinin qorunması üçün hər şeyi etmişik və etməkdə davam edirik”, – deyə Rubinyan bildirib.
O, erməni şirkətlərinə qarşı tətbiq edilən məhdudiyyətlərə də toxunaraq bunları “ədalətsiz və əsassız” adlandırıb. Rubinyanın fikrincə, belə tədbirlər nə Ermənistan-Rusiya münasibətlərinin ruhuna, nə də Avrasiya İqtisadi İttifaqının qaydalarına uyğundur.
“Xatırlatmaq istəyirəm ki, Aİİ-nin mövcudluğunun bütün mənası malların sərbəst və rüsumsuz hərəkətidir. Burada isə, ən azı de-fakto, azad hərəkətdən söhbət gedə bilməz”, – deyə o qeyd edib.
Parlament sədri Ermənistanın Aİ-yə üzvlük perspektivi barədə isə diqqətçəkən açıqlama verib. Onun sözlərinə görə, Aİİ-dəki tərəfdaşların Ermənistanı referendum keçirməyə çağırması faktiki olaraq İrəvanı əvvəlcə Aİ-yə üzvlük üçün rəsmi müraciət etməyə sövq edir.
Rubinyan izah edib ki, sadəcə “Aİ-yə üzv olmaq istəyirsinizmi?” sualı ilə referendum keçirmək mümkün deyil. Əvvəlcə Ermənistan üzvlük üçün müraciət etməli, Aİ-dən müsbət cavab almalı, mümkün üzvlüyün konkret şərtləri və zaman çərçivəsi aydınlaşmalıdır.
“Yalnız bundan sonra referendum keçirmək mümkün olacaq”, – deyə Rubinyan vurğulayıb.
Beləliklə, Moskvanın İrəvandan Aİ ilə Aİİ arasında seçim etməsi barədə getdikcə sərtləşən çağırışları fonunda Ermənistan rəhbərliyi Aİ-yə rəsmi üzvlük müraciətinin referendumdan əvvəl gələcəyini artıq açıq şəkildə ifadə edir.
Musavat.com
XƏBƏR LENTİ
27 Avqust 2026
26 Avqust 2026
ŞƏRHLƏRŞƏRH YAZ