Onlayn ictimai-siyasi qəzet
Paşinyanın adamı HƏDDİNİ aşdı – TRIPP elə Zəngəzur dəhlizidir!..
Prezident İlham Əliyev Az TV-yə dünənki müsahibəsində Zəngəzur dəhlizi haqda da danışıb. Dəhlizin mütləq açılacağını deyib. Xüsusi qeyd edib ki, 2025-ci il avqustun 8-də tarixi Vaşinqton Zirvə Görüşündə məsələ artıq öz həllini tapıb.
Sitat: “Bu yaxınlarda, üç gün bundan qabaq – avqustun 8-də Prezident Trampla söhbət əsnasında bu məsələyə də toxunuldu və hər iki tərəf əminliyini vurğuladı ki, bu önəmli nəqliyyat layihəsi mütləq və tezliklə icra ediləcək”...
Azərbaycan tərəfinin rəsmi səviyyədə vaxtaşırı “Zəngəzur dəhlizi” ifadəsini işlətməsi isə Ermənistanda hələ də qıcıq yaratmaqdadır. O sırada hakim “Vətəndaş Müqaviləsi” Partiyasından olan deputat Arman Yexoyan bu gün iddia edib ki, “imzalanmış sənədlər, bəyanatlar və hətta saziş layihələri mövcud olsa da, “Zəngəzur dəhlizi” termini heç yerdə yoxdur, buna bənzər bir şey də yox”.
"Siyasi ritorika səviyyəsində çox şey deyilə bilər, amma biz də deyirik ki, Ermənistanda bu adda infrastruktur yoxdur. Azərbaycan Prezidenti, ABŞ Prezidenti və Ermənistan Baş naziri tərəfindən imzalanan TRIPP layihəsi var”, - Yexoyan bildirib və əlavə edib ki, bölgədə nəqliyyat yollarının açılması hər üç tərəf üçün faydalıdır...
Paşinyanın partiyadaşının adla bağlı bu təlaşı, əlbəttə ki, yersizdir.
Əvvəla, nə olsun ki, 8 avqust sənədində TRIPP yazılıb? Hamı bilir ki, məsələn, “Sevan” – Göyçə gölünün uydurma adıdır. Çünki bütün tarixi, mötəbər sənədlərdə, o sırada Çar Rusiyasının xəritələrində bu su hövzəsinin adı məhz Göyçədir. Zəngəzur da eyni səbəbdən Zəngəzurdur, uydurma zad deyil.
Qondarma, saxta olan erməni tarixidir! Bir məşhur rus araşdırmaçı alimin söylədiyi kimi, “ermənilər öz tarixlərinə görə tarixə yox, tarixçilərə borcludur”. Yəni yenə uydurma hekayələr, kitablar məsələsi...
İndi Zəngəzurdan keçəcək dəhlizin adı ayrı necə ola bilər ki? Eybi yox, qoy həm də TRIPP (“Tramp marşrutu”) adlansın. Amma axı TRIPP-lə bağlı anlaşmanın özündə də - hansı sənədə ki, Donald Tramp və Nikol Paşinyan da imza atıb - açıq mətnlə dəhlizin məhz Azərbaycan üçün MANEƏSİZ olacağı vurğulanır.
Yeri gəlmişkən, bir neçə gün öncə ABŞ-nin Bakıdakı səfirliyinin Ağ Evdəki 8 avqust sammitinin ildönümü ilə bağlı yaydığı bəyanatda da dəhlizin Azərbaycan üçün maneəsizliyi xüsusi qabardılıb. Maneəsizlik isə elə dəhliz məntiqidir, cənab Yexoyan! Eyni şərt Ermənistanın da imzaladığı 10 noyabr (2020) üçtərəfli kapitulyasiya sənədinin 9-cu bəndində əksini tapıb...
Azərbaycan üçün hər iki istiqamətdə maneəsizlik necə təmin olunacaq, bunu erməni tərəfi özü bilər. Bizim üçün əsas olan insanlarımızın, mal və yüklərin yoxlama-filan olmadan keçididir. Zira, söhbət Azərbaycanın bir hissəsindən digərinə adlamaqdan gedir. Nə gömrük, nə rüsum, nə yoxlama? Məgər Rusiyadan Litva ərazisi ilə eksklav Kalininqrada gedən yüklər, insanlar yoxlanılır?
Ən mühümü, bu, bizim xalq olaraq, həm də mənəvi haqqımız! Nədən ki, məhz 105 il öncə (2021 noyabr) bolşevik Rusiyasının Qərbi Zəngəzuru Ermənistana bağışlaması nəticəsində Naxçıvan materik Azərbaycandan ayrı düşüb...
Zahid SƏFƏROĞLU 
XƏBƏR LENTİ
17 Avqust 2026
ŞƏRHLƏRŞƏRH YAZ