Onlayn ictimai-siyasi qəzet
Moskva kilsəsində DƏHŞƏTLİ İDDİALAR
Moskvadakı kilsələrdən birində yetkinlik yaşına çatmayanlarla bağlı son dərəcə ağır ittihamların ortaya çıxmasından üç ay keçsə də, qalmaqal səngiməyib. Araşdırma müəlliflərinin iddiasına görə, barələrində ittihamlar səsləndirilən din xadimləri hələ də vəzifələrində qalır, onlardan biri isə uşaqların iştirak etdiyi bazar günü məktəbinin fəaliyyətində iştirak edir.
Musavat.com xəbər verir ki, bu barədə Rucriminal.info layihəsi məlumat yayıb.
Mənbə xatırladır ki, söhbət Moskvanın Kazyonnaya Sloboda ərazisində yerləşən Apostol İakov Zevedeyev kilsəsində baş verən qalmaqaldan gedir.
Valideynlərin iddialarına əsaslanan materialda kilsənin baş keşişi, Moskva Patriarxlığının İşlər İdarəsinin İnformasiya Monitorinqi Xidmətinin keçmiş rəhbəri ieromonax Yermogen Burygin barəsində yetkinlik yaşına çatmayanlara qarşı seksual xarakterli hərəkətlərlə bağlı ağır ittihamların irəli sürüldüyü bildirilir.
Materialda digər din xadimi – ieromonax Vissarion Krasovskinin də adı çəkilir. Mənbə Yermogenlə onun arasında münasibətlərin olması barədə ayrıca iddiaların səsləndirildiyini yazır.
Bu məlumatların müstəqil şəkildə təsdiqlənmədiyini və sözügedən şəxslər barəsində məhkəmənin ittihamedici hökmü barədə məlumat verilmədiyini xüsusi qeyd etmək lazımdır.
Araşdırma müəlliflərinin bildirdiyinə görə, qalmaqalın üzərindən üç ay keçməsinə baxmayaraq, Yermogen Burygin kilsənin baş keşişi olaraq qalır, Vissarion Krasovski də fəaliyyətini davam etdirir. Mənbə onların dini icma ilə, o cümlədən uşaqların iştirak etdiyi bazar günü məktəbi çərçivəsində işləməyə davam etdiyini iddia edir.
Valideynlərin əsas narahatlığı da məhz bununla bağlıdır.
Mənbənin iddiasına görə, ötən müddət ərzində ictimaiyyətə açıq və şəffaf araşdırmanın aparıldığı barədə məlumat verilməyib. Material müəllifləri hesab edirlər ki, yaranmış fasilədən qalmaqalın səngidilməsi və vaxt qazanılması üçün istifadə oluna bilər.
Valideynlər daha bir ciddi iddia irəli sürürlər. Onların sözlərinə görə, qalmaqalın ilk günlərində kilsə rəhbərinin mobil cihazlarından kompromat xarakterli məlumatların bir hissəsi silinib. Bu iddianın da müstəqil təsdiqi təqdim olunmur.
Materialda hadisənin iştirakçılarına və mümkün şahidlərə təzyiq göstərildiyi də iddia edilir. Bildirilir ki, əsas zərərçəkənlərdən biri hesab edilən qadın oğlu ilə birlikdə təcili şəkildə Moldovaya aparılıb. Araşdırma müəllifləri bunu mümkün şahidlərin müstəqil jurnalistlər və hüquq-mühafizə orqanları ilə təmasdan uzaqlaşdırılması cəhdi kimi qiymətləndirirlər.
Valideynlər və materialın müəllifləri kilsə rəhbərliyindən və hüquq-mühafizə orqanlarından müstəqil və hərtərəfli araşdırma aparılmasını, onun nəticələrinin ictimaiyyətə açıqlanmasını, həmçinin araşdırma müddətində adları qalmaqalda hallanan din xadimlərinin uşaqlarla işləməkdən müvəqqəti kənarlaşdırılmasını tələb edirlər.
“İnternet hər şeyi xatırlayır, həqiqəti gizlətmək mümkün deyil”, – deyə materialda valideynlərin sözləri təqdim olunur.
Araşdırma müəllifləri yaxın vaxtlarda ieromonax Yermogenin şəxsi həyatı ilə bağlı olduğunu bildirdikləri videomaterialları da yayımlayacaqlarını açıqlayıblar.
İndi əsas sual Moskva yeparxiyası rəhbərliyinin və hüquq-mühafizə orqanlarının bu ağır iddialara münasibət bildirib-bildirməyəcəyidir.
Musavat.com
XƏBƏR LENTİ
23 Sentyabr 2026
ŞƏRHLƏRŞƏRH YAZ