Onlayn ictimai-siyasi qəzet
Britaniya enerji şəbəkəsini özəl əllərdən alacaq
Böyük Britaniya hökuməti enerji şəbəkəsini idarə etmək üçün dövlət şirkəti yaratmaq niyyətindədir.
Musavat.com Sky News-a istinadən xəbər verir ki, Baş nazir Endi Börnhem Liverpulda Leyboristlər Partiyasının konfransındakı çıxışı zamanı bu barədə məlumatı açıqlamaq niyyətindədir.
Kanal qeyd edir ki, "Böyük Britaniya Şəbəkəsi" adlanan dövlət şirkətinin yaradılması Marqaret Tetçerin 1979-cu ildən 1990-cı ilə qədər hakimiyyətdə olan Mühafizəkarlar hökumətinin Britaniya elektrik sənayesinin özəlləşdirilməsinə başlamasından 36 il sonra planlaşdırılır.
Hazırkı baş nazir özəlləşdirmənin investisiya çatışmazlığına və inkişafın yavaşlamasına səbəb olduğunu, iqtisadi artıma maneələr yaratdığını düşünür. Börnhem hesab edir ki, yeni dövlət şirkəti şəbəkə bağlantılarını sürətləndirməyə və xərcləri azaltmağa kömək edəcək, həmçinin onun yenidən sənayeləşdirmə proqramını dəstəkləyəcək: "Biz yaşayış xərcləri böhranı yaşayırıq. Enerji qiymətləri biznes üçün davamlı olmayan bir yükə çevrilir və Britaniya istehlakçıları Avropada ən yüksək enerji qiymətlərindən bəzilərini ödəyirlər".
Börnhemin "Britaniya ictimaiyyətinin elektrik enerjisi qiymətlərinə nəzarəti itirdiyindən" şikayətlənərək “səmərəsiz enerji bazarını ictimai maraqlara xidmət etməsi üçün islah edəcəyinə" söz verəcəyi gözlənilir.
Qeyd edək ki, bir gün əvvəl Britaniya hökuməti gələn ilin mart ayında Avanti Qərb Sahil dəmir yolu operatorunu milliləşdirmək niyyətini açıqlayıb. Sky News-un qeyd etdiyi kimi, bu operatorun milliləşdirilməsi hökumətin sərnişin dəmir yolu xidmətlərinin əksəriyyətini dövlət mülkiyyətinə keçirmək və sonradan onları Böyük Britaniya Dəmir Yolları brendi altında birləşdirmək planının bir hissəsidir. Bu proses əvvəlki Mühafizəkarlar Partiyasının rəhbərlik etdiyi hökumət dövründə başlamışdı.
Musavat.com
ƏLAQƏLİ XƏBƏRLƏR
XƏBƏR LENTİ
11 Oktyabr 2026
10 Oktyabr 2026
ŞƏRHLƏRŞƏRH YAZ