Onlayn ictimai-siyasi qəzet
Qlobal almaz istehsalı azalıb: Ən çox geriləmə Rusiyadadır
2023-cü ildə qlobal almaz istehsalı illik müqayisədə 8 faiz azalaraq 111,52 milyon karat təşkil edib.
Musavat.com Kimberley Prosesinin hesabatına istinadən xəbər verir ki, ölkələr arasında istehsalın ən çox azalması Rusiyada qeydə alınıb.
Bu ölkədə 2023-cü ildə almaz istehsalı 11 faiz azalaraq 37,32 milyon karat təşkil edib.
Şirkətin verdiyi məlumata görə, Rusiyanın ən böyük hasilatçısı olan ALROSA-nın ötən il istehsalı 34,6 milyon karat təşkil edib. ALROSA ilə yanaşı, Rusiyada mədən işlərini Arxangelsk bölgəsindəki Qrib yataqlarını işlədən AGD Diamonds həyata keçirir. Hər iki almaz mədənçisi ABŞ və Böyük Britaniyanın sanksiyaları altındadır və 2024-cü ilin yanvarından etibarən G7 ölkələri Rusiya almazlarının və 1 karat və ya daha çox cilalanmış almazların idxalına birbaşa qadağa tətbiq edib.
Ötən il Rusiyadan almaz ixracı 32,42 milyon karat təşkil edib ki, bu da 2022-ci il səviyyəsindən (36,73 milyon karat) 12 faiz aşağıdır, orta qiymət isə 8 faiz artaraq bir karat üçün 113,8 dollar təşkil edib. 2023-cü ildə ümumi ixracat 3,68 milyard dollar səviyyəsində qiymətləndirilir ki, bu da əvvəlki illə müqayisədə 5 faiz azdır.
Botsvana və Anqolada istehsal keçən il artaraq 25,1 milyon karat və 9,75 milyon karata (müvafiq olaraq 2 faiz və 11 faiz) çatıb. Kanadada istehsal 2 faiz azalaraq 16 milyon karata düşüb, Konqo Demokratik Respublikasında 23 faiz - 8,35 milyon karata qədər artıb.
Hindistanın qlobal bazarı əks etdirən almaz idxalı 2023-cü ildə 11 faiz azalaraq 127,75 milyon karata düşüb. Pul ifadəsində idxal 14,7 milyard dollar həcmində qiymətləndirilir ki, bu da 2022-ci il səviyyəsindən 12 faiz aşağıdır. Keçən il cilalanmış brilyantlara tələbatın azalması fonunda Hindistan kobud almazların idxalına embarqo tətbiq etdi və bu embarqo oktyabrın 15-dən dekabrın 15-dək qüvvədə idi.
Musavat.com
XƏBƏR LENTİ
06 Iyul 2024
ŞƏRHLƏRŞƏRH YAZ