ABŞ Maliyyə Nazirliyi Rusiyaya yardıma görə daha 18 Türkiyə şirkətini sanksiya siyahısına salıb.

Musavat.com nazirliyin saytında yerləşdirilən məlumata istinadən xəbər verir ki, şirkətlər Türkiyənin müxtəlif şəhərlərində qeydiyyatdan keçib, əksəriyyəti İstanbuldadır. Antalyadan, Konyadan, Ankaradan, Bursadan şirkətlər var.

Siyahıya daxil olan şirkətlərin bəziləri müxtəlif təyinatlı malların idxalı və ixracı ilə məşğul olur. Şirkətlərdən ikisi dəniz gəmilərinə xidmət göstərən və ya inşa edən tərsanədir. Bir neçə şirkət müxtəlif təyinatlı və komponentlər üçün sənaye avadanlığı, həmçinin sənaye obyektlərində xidmət bölmələri təqdim edir.

Siyahıya həmçinin biokimya üçün tibbi avadanlıq, kimyəvi reagentlər və materiallar təqdim edən şirkət də daxildir. Bu şirkətlərin əksəriyyəti “ikinci dərəcəli sanksiyalar riski” ifadəsi ilə siyahıya daxil edilib.

Xatırladaq ki, may ayında ABŞ Maliyyə Nazirliyi Türkiyədə qeydiyyatdan keçmiş 17 şirkətə qarşı sanksiya tətbiq edib. Sonra beynəlxalq ticarət, material və avadanlıqların, o cümlədən elektronikanın tədarükü ilə məşğul olan şirkətlər məhdudiyyətlərə məruz qaldı. Neft-qaz sektorunda, təyyarə və kosmik gəmilərə texniki xidmət və təmir sahəsində xidmət göstərən şirkətlərə qarşı da sanksiyalar tətbiq edilib.

Musavat.com