Rusiya tərəfindən Ermənistana qarşı tətbiq edilən ardıcıl iqtisadi qadağalar və ticari məhdudiyyətlər fonunda Ermənistan rəhbərliyindən rəsmi Moskvaya yönəlmiş ittihamların tərzi getdikcə daha da sərtləşir.

Musavat.com xəbər verir ki, Ermənistan Milli Assambleyasının (parlamentinin) sədri Alen Simonyan yerli "Factor TV" kanalına verdiyi sensasiyalı müsahibəsində Rusiyanın İrəvanı çökdürmək məqsədi güdən iqtisadi həmlələrini şərh edib və Kreml rəhbərliyini rəsmən səhv yoldan dönməyə çağırıb. Rusiyanın təzyiq metodlarının artıq Ermənistanda keçərli olmadığını bəyan edən spiker, Moskvaya hədə dolu "dostluq" məsləhəti verib: "Mən Rusiya tərəfinə bircə məsləhət vermək istəyirəm: onların seçdiyi bu aqressiv hərəkət və təzyiq üslubu Ermənistanda qətiyyən işə yaramayacaq. Əksinə, bu addımlar tamamilə tərs effekt verəcək və erməni cəmiyyətində Rusiyaya qarşı nifrəti daha da artıracaq. Onları keçmişdə başqa ölkələrə qarşı etdikləri eyni qorxulu səhvləri Ermənistanda da təkrarlamamağa çağırıram".

Alen Simonyan rəsmi İrəvanın Moskva ilə münasibətləri qəsdən kəskinləşdirmək və tam müharibə vəziyyətinə gətirmək niyyətində olmadığını iddia etsə də, Kremlin tətbiq etdiyi embarqolara boyun əyməyəcəklərini qətiyyətlə bildirib. Parlament rəhbərinin sözlərinə görə, əgər Rusiyanın iqtisadi sanksiyaları iyun ayında da bu tempdə davam edərsə, Ermənistan hökuməti öz iqtisadi çətinliklərini Rusiyadan kənar alternativ yollarla tamamilə həll edəcək və buna gücü çatacaq.

Musavat.com