Türkiyə televiziyalarında ötən mövsümün ən çox izlənən layihələrindən biri olan “A.B.İ.” serialı ikinci mövsümə əsaslı dəyişikliklərlə başlayıb. Qadın baş rol, ssenarist və rejissor dəyişib, heyətə xeyli yeni aktyor qoşulub, hadisələr isə səkkiz aylıq zaman keçidindən sonra tamam fərqli istiqamətdə davam etdirilib.

Musavat.com xəbər verir ki, Türkiyə mediası serialın ikinci mövsümünü adi davamdan daha çox, layihənin yenidən qurulması kimi qiymətləndirir. Ancaq yeni aktyorlar və daha dinamik süjet ilk bölümdə “ABİ”ni əvvəlki reytinq zirvəsinə qaytara bilməyib.

“Karadayı”nın məşhur cütlüyü yenidən bir arada

Yeni mövsümün ən böyük transferi Bergüzar Korel olub. Birinci mövsümdə Çağla obrazını canlandıran Afra Saraçoğlunun gedişindən sonra Korel serialın yeni qadın baş roluna gətirilib.

Beləliklə, “Karadayı” serialında böyük tamaşaçı rəğbəti qazanan Kenan İmirzalıoğlu–Bergüzar Korel tandemi 12 ildən sonra yenidən eyni layihədə görüşüb. Türkiyə mətbuatında və sosial şəbəkələrdə bu seçimə əsasən müsbət reaksiyalar verilib. Yeni mövsüm afişası yayıldıqdan sonra “Əsl uyğunluq budur”, “Karadayı ruhu geri qayıdır” kimi şərhlər diqqət çəkib.

Lakin Bergüzar Korel əvvəlki qadın obrazın birbaşa əvəzedicisi kimi təqdim edilmir. Onun canlandırdığı Leyla Doğanın keçmişdə böyük eşq yaşadığı, sonradan yollarının ayrıldığı sirli qadındır. İlk bölümdə Leylanın əslində gizli tapşırıq yerinə yetirən polis əməkdaşı olduğu üzə çıxır.

Doğan öldü sanılırdı, səkkiz ay sonra geri qayıtdı

İkinci mövsüm Doğanın öldüyünün düşünüldüyü səhnələrin davamı ilə başlayıb. Məlum olur ki, onu Galip xilas edib və səkkiz ay ərzində gizli şəkildə müalicə etdirib.

Doğan özünə gəldikdən sonra ailəsinin dağıldığını, Hancıoğullarına məxsus sərvət və imkanların Saruhanın nəzarətinə keçdiyini öyrənir. Ailəsinin başına gələnlərin arxasında da məhz Saruhanın dayandığını anlayan Doğan sağ olduğunu gizlədərək intiqam planı qurur.

Beləliklə, birinci mövsümdə daha çox ailə sirləri və qohumlararası qarşıdurmalar üzərində qurulan serial ikinci mövsümdə kriminal şəbəkə, gizli polis əməliyyatı və hakimiyyət savaşı istiqamətinə keçir. Aksiyon səhnələrinin artırılması da bu dəyişikliyin əsas hissəsidir.

Doğanın qarşısına yeni və təhlükəli düşmən çıxdı

Mustafa Üstündağ serialda yeni əsas mənfi obraz – Saruhan Nadiroğlu rolunu oynayır. Yoxsulluqdan və çətinliklərdən çıxaraq öz imperiyasını quran Saruhan ağıllı, soyuqqanlı və gücə həddindən artıq bağlı bir şəxs kimi təqdim edilir.

Saruhan yalnız Doğanın ailəsini dağıdan adam deyil, həm də Leylaya aşiqdir. Yeni mövsümün ilk bölümünün finalında onun Leylaya evlilik təklifi etməsi Doğan–Leyla–Saruhan üçbucağını serialın əsas xəttinə çevirib.

Leyla Saruhanın daxil olduğu cinayət şəbəkəsini ifşa etmək üçün onun yanında olsa da, Doğan vəziyyətin həqiqi mahiyyətini bilmir. Keçmiş sevgilisinin düşməni ilə birlikdə olduğunu düşünən Doğan həm qısqanclıq, həm intiqam, həm də ailəsini geri qaytarmaq istəyi arasında qalır.

Saadet Işıl Aksoy da ekrana qayıtdı

Yeni mövsümün başqa diqqətçəkən transferi Saadet Işıl Aksoydur. O, Saruhanla əlaqəli Rüya obrazını canlandırır. Ağır itkilər və məyusluqlar yaşamış Rüya ilk baxışda kövrək və saf qadın təsiri bağışlasa da, onun Saruhanla münasibətinin yeni bölümlərdə ciddi sirləri ortaya çıxaracağı gözlənilir.

Doğan Saruhana çatmaq üçün Rüya ilə yaxınlıq qurmağa başlayır. Bu isə həm Leylanın gizli əməliyyatını təhlükəyə atır, həm də yeni bir münasibətlər düyünü yaradır.

Seriala Bergüzar Korel, Mustafa Üstündağ və Saadet Işıl Aksoydan əlavə Çağdaş Çelik – Ferman, Oğulcan İnan – Yaşar, Asuman Karakollukçu – Hacıanne, Baran Ayhan – Kudret, Suat Karausta – Hayati, Mert Yavuzcan – Nihat və Hilmi Özçelik – Adnan rolları ilə qoşulublar.

Layihənin rejissorluğu Yağız Alp Akaydına həvalə edilib. Yeni mövsümün ssenarisini isə Ertan Kurtulan və Eylem Akın yazır. Türkiyə mediası bu dəyişikliklərin serialın atmosferini ailə dramından daha sərt kriminal drama çevirdiyini qeyd edir.

Yeni mövsümün reytinqi necə oldu?

Səs-küylü transferlərə və Kenan İmirzalıoğlu–Bergüzar Korel görüşünə baxmayaraq, “ABİ” ikinci mövsümə əvvəlki gücündən xeyli aşağı göstərici ilə başlayıb.

Sentyabrın 8-də yayımlanan 19-cu bölüm Total kateqoriyasında 3,82 reytinq və 13,32 faiz izlənmə payı əldə edib. Serial həmin kateqoriyada ikinci olsa da, 4,57 reytinq toplayan “Tuzlu Kahve”ni keçə bilməyib. “ABİ” AB kateqoriyasında 2,88 reytinqlə dördüncü, ABC1-də isə 3,66 reytinqlə üçüncü yeri tutub.

Müqayisə üçün, birinci mövsümün final bölümü Total kateqoriyasında 5,18 reytinq toplamışdı. Beləliklə, yeni mövsümün açılışında Total auditoriyası təxminən 26 faiz azalıb. Üstəlik, 3,82 göstəricisi serialın indiyədək qeydə alınmış ən aşağı Total nəticəsidir.

Xatırladaq ki, “ABİ” ilk mövsümün başlanğıcında 11 reytinq həddini keçərək həftələrlə lider olmuşdu. Sonrakı aylarda izlənmə göstəriciləri tədricən aşağı düşsə də, serial mövsümü əksər həftələrdə birinci pillədə tamamlamışdı.

İkinci mövsümün ilk nəticəsi layihənin uğursuz olduğunu söyləmək üçün hələ kifayət deyil. Yay fasiləsindən qayıdan seriallarda ilk həftə auditoriya itkisi adi haldır. Ancaq “ABİ”nin qarşısında indi iki ciddi vəzifə dayanır: Afra Saraçoğlu ilə formalaşmış əvvəlki izləyici kütləsini qorumaq və tamamilə dəyişdirilmiş süjetə yeni tamaşaçı cəlb etmək.

Yeni heyət maraq yaradıb, Bergüzar Korel və Kenan İmirzalıoğlunun ekran uyğunluğu müsbət qarşılanıb, Mustafa Üstündağın Saruhan obrazı isə seriala güclü rəqib gətirib. Bununla belə, ilk reytinq göstərir ki, böyük aktyor adları təkbaşına kifayət etmir. “ABİ”nin həqiqi imtahanı qarşıdakı iki-üç bölümdə olacaq: ya yeni hekayə tamaşaçını yenidən ekrana qaytaracaq, ya da mövsümün ən iddialı dəyişikliklərindən biri gözlənilən nəticəni verməyəcək.

Musavat.com